Матурлык бар кешене шатландырсын

Журналистлар төркеме шәһәр территориясенең иң төзекләндерелгән урыннарын барлау өчен рейдка чыкты.


Иң элек Күпфункцияле үзәк янына юнәлдек. Клумбалардагы чәчәкләрнең күптөрлелеге күзләрне иркәли. Нотариаль контора алдында да чәчәк түтәлләре ясалган. Анда без хәтта бер куак крыжовник та күрдек. 4 нче мәктәп һәм 6 нчы балалар бакчасы янында коммуналь хезмәт өлкәсендә эшләүчеләр карт агачларны кисәләр.
4 нче мәктәп территориясендә укучылар һәм укытучылар эшли: җирне йомшарталар, чәчәкләрнең әйләнә-тирәсен казыйлар.
- Сыйныф җитәкчеләре укучылар белән берлектә мәктәп территориясенә беркетелгән. Балалар чиратлашып унар көн эшлиләр. Август азагы-сентябрь башында эшнең нәтиҗәсе күренә. Бу матурлык укучы һәм укытучыларны гына түгел, барлык узып баручыларны да шатландырсын иде. Мәктәп кенә түгел, аның әйләнә-тирә территориясе дә матур булсын дип телибез, - ди 11 нче сыйныф җитәкчесе Ирина Смолькова.

- Әгәр һәр оешма үз территориясенә чәчәк утыртса, шәһәребез гөлбакча булыр иде, - ди "Нурлы" клиникасы баш табибы Фәрваз Галиев.
Монда асфальт салынган, чәчәкләр үсә, куаклар "тере" киртә булып тора.
"Чәчәк хуҗалыгы" программасы буенча шәһәрнең берничә предприятие һәм оешмасы эшкә кереште. Алар арасында "Химик" спорт комплексы, "Айсберг" боз сарае, "Нептун" бассейны, сәүдә нокталары, "Юность" район мәдәният йорты, Пенсия фонды да бар. 1 нче мәктәп территориясе ел саен шәһәрлеләрдә соклану тудыра.
БИҮ янында узып баручыларны педагоглар һәм шәкертләр кулы белән ясалган тәвә кошы каршылый. Анда шулай ук аккошлар һәм бака яши торган буа бар. Ерактан карасаң, алар тере кебек.
Күпкатлы йортларда яшәүчеләр дә бу эштән читтә калмыйлар. Мәктәп тыкрыгының 1 нче, Трудовая урамының 9 нчы, Чоловский урамының 8а, Профсоюзная урамының 4 нче, Тукай урамының 4 нче һ.б. йортлар янындагы чәчәк түтәлләре кырыннан үтүе күңелле.
- Тәрәзә каршында гөлләр чәчәк атканда, җанга рәхәтлек иңә, - диләр ул йортларда яшәүчеләр.