Менделеевскида республика президенты Рөстәм Миңнеханов булып китте

Чәршәмбе көнне республика Президенты Рөстәм Миңнеханов эш визиты белән районда булды, авыл хуҗалыгы эшләре барышы белән танышты.
"Кама" колхозы" ҖЧҖ басуларында ТР авыл хуҗалыгы министры озатуында югары кунакны район башлыгы Игорь Привалов, авыл хуҗалыгы идарәсе начальнигы Рөстәм Галәмов, авыл хуҗалыгы берләшмәләре җитәкчеләре, җирлекләр башлыклары каршылады.
Игорь Анатольевич хәбәр итүенчә, язгы кыр эшләре тәмамлану алдында, "Кама" колхозы" ҖЧҖ хезмәтчәннәре чәчүне төгәлләделәр.
Президент авыл хуҗалыгы җитештерүенең төп күрсәткечләре белән кызыксынды, савымның һәм сөт продукциясе сатуның түбән күләмен билгеләде.
- Димәк, башка юнәлештә эшләргә, шәхси ярдәмче хуҗалыкларга, гаилә фермаларына өстенлек бирергә, кешеләрне авыл хуҗалыгы бизнесына өйрәтергә кирәк, - диде Рөстәм Нургалиевич.
Районда агропарк үсеше планлаштырыла. Заманча сөт комплексы проекты белән инвестор - "Акваполимер" ҖЧҖ директоры Рөстәм Мәхмүтов таныштырды.
- Комплекс төзелеше авыл хуҗалыгын үстерүгә импульс бирер, - дип фикерен белдерде Президент.
Пәнҗешәмбе көнне республика башлыгы аммиак, метанол һәм карбамид җитештерү буенча "Аммоний" комплексында булды.
Ул төзелеш барышы белән танышты һәм әлеге күләмле проектны тормышка ашыру мәсьәләләре буенча киңәшмә уздырды.
Төзелеш мәйданчыгында Президентка көйләү-җибәрү эшләре барган цехларның берсен күрсәттеләр. Рөстәм Миңнеханов шулай ук үзәк операторлык пунктын, йөк терминалының төзелеш мәйданчыгын һәм әзер продукция складын карады.
Төзелеш штабында киңәшмәне ачып, ТР Президенты көйләү-җибәрү эшләренең мөһим чоры башлануын, шунлыктан проблемалы мәсьәләләрне хәл итәргә кирәклеген билгеләде.
- Безнең бурыч - заводны 2015 елның августында жибәрү, - дип ассызыклады Р.Миңнеханов.
Президент төзелеш мәйданчыгында җәйге чорда аеруча актив эшләргә чакырды. Рөстәм Миңнеханов әйтелгән кимчелекләрне исәпкә алып беркетмә төзүне йөкләде.
Президентны район башлыгы Игорь Привалов, "Аммоний" комплексы директоры Сергей Шевченко, чит ил консорциумы вәкилләре озатып йөрде.
Фото tatar-inform.ru сайтыннан