Мин сине шундый яратам...

Кондитер исе килгән бу романтик тарихны менделеевлылар беренче тапкыр искиткеч кешеләр - безнең якташларыбыз тормышына багышлаган кичәдә ишеттеләр. Ә Резедә Прокофьева аны болай сөйли: "Ничектер без дустым Клава Софронова белән "Коммуна"га танцыга килдек. Сәхнә кырында ук биедек. Пианинода уйнаучы егет безнең якка еш күз сала. Клава әйтә: "Юкка болай карамый ул, мөгаен синең язмышыңдыр". Без 16 кекска бәхәсләштек..." Алга таба вакыйгалар билгеле сценарий буенча җәелә: Лазарь Резедәне өенә озатып куярга тәкъдим ясый...

Гашыйк мәктәп укучылары шундук җирле халыкның игътибар үзәгенә әверелә. Яшерен генә унлаган кыз мәхәббәт тоткан популяр ВИА музыканты Лазарь һәм мөлаем, тормышчан Резедә буш вакытларын бергә үткәрергә тырышалар. Иртән егет кыз артыннан керә, аны 1 нче мәктәпкә озатып куя, аннан үзенең 4 нче мәктәбенә йөгерә. Мөнәсәбәтләрен яшьтәшләре кызыксынып һәм көнләшү белән күзәтә. Чөнки барысы да шундый чын һәм тугры дуслык турында хыяллана.

Мәктәпне тәмамлагач, Резедә күптәнге артист булу теләген тормышка ашыру өчен Казанга китә. Театр училищесына имтиханнарын уңышлы тапшыргач, педагогларны өйгә кайту карары белән борчуга сала. Ничек кенә үгетләмәсеннәр, документларын ала: ул Лазарьдан аерым яши алмаячак.

Алар 1980 елда унсигез яшьләрендә өйләнешәләр, бераздан әти-әни булалар. "Иң яшь парны уллары Станислав - Выборг шәһәренең нәни граҗданины туу белән тәбриклибез", - бу сүзләр әле дә колакларында яңгырый. Яшьләр гаилә тормышын Ленинград өлкәсендә, туганнарыннан читтә һәм аларның яклавыннан һәм ярдәменнән башка кеше фатирында башлыйлар. Биредә дә Лазарь вокаль-инструменталь ансамбльдә уңышлы чыгыш ясый. Күпләр аның урыны профессиональ сәхнәдә дип исәпли.

- Син минем аркада профессиональ музыкант булмадың дип әле дә әйтә, - ди Резедә. - "Ә син миңа була актриса түгел" дип җавап бирә.

Армиягә повестка килгәч, Резедә хәрби комиссариатта күз яшьләре белән ирен алмауларын сорый. "Мин бит аннан башка яши алмаячакмын". Ләкин яшь әтине армиягә җибәрәләр. Ике ел эчендә алар бер-берсенә йөзләгән хат язалар. Резедә өч тапкыр сөеклесе хезмәт иткән Коломнага бара.

Аларның ныклы союзы - хорафатларны бер читкә куеп - майда теркәлә.

- Без майда таныштык һәм майда өйләнештек тә. Кызыбызга да Майя дип исем куштык. Мин Лазарьга туган көненә кыз бүләк итәм, дидем. Шулай булып чыкты да, ә сроклар буенча ике атнадан соң гына туарга тиеш иде.

Майядан ун елдан соң гаиләдә Данил туа. Бу вакытта Резедә бизнесын актив җәелдерә. Һәм өченче балага янәшәсендә иренең ныклы җилкәсен тоеп кына карар кыла. Хәзер Данилга 14 яшь, кызыксынулары исәбендә - музыка, аның серләренә әтисе җитәкчелегендә төшенә.

Фронтовичка әнисе Гатифә Гыйниятовнаны, өч баласын, киленнәрен, оныгы Анастасияне, Лазарьның күпсанлы туганнарын һәм озак еллар дәвамында якынлашып беткән дусларын эченә алган Резедә Прокофьева гаиләсе - зур һәм тату.

Йортта бер стенаны тормышларының иң истәлекле моментларын чагылдырган фотогалерея били.

- Фотоларны беркемгә күрсәтмичә альбомда яткырудан ни мәгънә? - дип урынлы сорау бирә хуҗабикә. - Ә болай, бу вакыйгаларны искә төшереп, энергия алам.

Прокофьевлар бер шиксез имин һәм тәэмин ителгән гаиләләр рәтенә керә. Булганның барысы да нульдән үз куллары белән һәм бер-берсе һәм балалары өчен яшәүгә омтылу максатына төзелгән. Идеяләрнең генераторы, әлбәттә инде, Резедә. Ул бизнеста үз урынын тапкан уңышлы эшмәкәр. Йортларын төзегәндә һәм җиһазлаганда үзен интерьер һәм бакча дизайнеры итеп таныта.

- Мин әйләнә-тирә дөньяны бизәргә телим. Бу тормышка сөенергә, позитив алыга ярдәм итә, - ди Резедә. - Ә күп әйберне кул астындагы материалдан да ясап була.

Ул күгәргән металл мичкәләрне чәчәкләр өчен оригиналь аскуймага әверелдергән. Бакчаны, зур булмаган буаны үз куллары белән җиһазлаган. Иске җиһазлардан кызыклы интерьер предметлары ясый. Идеяләрнең күпчелеген алтын куллы Лазарь тормышка ашыра. Алар бергәләп йортларын штукатурлаганнар, бизәү эшләрен башкарганнар. Стенадагы рәсемнәр - Резедә кулы. Балконны, баскыч култыксаларын, чәчәкләр өчен аскуймаларны, карават башларын Лазарь осталарча коеп ясаган. Йортларын төзекләндерүгә бөтен йөрәкләрен биргәннәр, шуңа да ул матур, уңайлы, туганнарын, дусларын гына түгел, үтеп йөрүчеләрне дә үзенә тартып тора.

Кунакчыл һәм ачык йөзле хуҗабикә, искиткеч алма пирогы белән сыйлап, шунда ук бик теләп аның рецепты белән дә бүлешә.

- Ә гаилә бәхетенең рецепты бармы? - дип сорыйбыз.

- Бу - еллар үтү белән ныгый гына барган чын мәхәббәт. Мин тормышымны Лазарьдан башка күз алдына китерә алмыйм. Кулга-кул тотынышып янәшә утыру да минем өчен бәхет.

- Минем хатыным, - ди гаилә башлыгы, - чын вулкан. Иртәгә тагын нәрсә уйлап табасын белмим. Шуның өчен дә аны яратам.

Резедә сүзләренчә, эшләп тапкан акчаларына алар иң яхшы кулланыш тапканнар - сәяхәтләр. Нинди генә шәһәрләрдә һәм илләрдә булмаганнар, бер-берсенә нинди генә тәэсирләр бүләк итмәгәннәр. Балаларының һәм сөеклеләренең очкынлы күзләрен күрү - Прокофьевларның тормыш мәгънәсе шунда.

Аларның тормышы розалардан гына тормый. Читтән караганда гына барысы да җиңел һәм уңышлы тоела. Һәр гаиләдәге кебек үк, сынаулар да җитәрлек булган. Ләкин мәхәббәт аларга алга атларга ярдәм итә - кайчакта туры мәгънәсендә.

Нәкъ менә Лазарь берничә ел элек Резедәне уңышсыз операциядән соң яңадан йөрергә өйрәткән.

- Башка ирләр күп дигәндә дүрт көнгә түзәләр иде, - дип Лазарьның түземлегенә һәм Резедәнең сабырлыгына гаҗәпләнгән медперсонал.

Уртак көч белән алар мөнәсәбәтләрен яңа дәрәҗәгә чыгарган һәм тагын бер тапкыр бер-берсенә мәхәббәт аңлатырга сәбәп биргән бәланы җиңәләр. Һәм әле дә алар яшь, матур, заманча һәм бәхетле, 35 ел элек кебек үк, әйләнә-тирәдәгеләрнең игътибарын җәлеп итәләр.

Без визит белән килгәндә Лазарь, тынгысыз хатынының чираттагы идеясен тормышка ашырып, ишегалдында кайнаша иде. Ул безнең әңгәмәдә катнашмады. Чөнки сөйләшү - хатын-кызлар өстенлеге. Ул үз хисләрен эшләре белән "әйтергә" күнеккән. Яисә җырлары белән. Еш кына хатыны өчен аның яратканын - Александр Серов репертуарыннан "Я люблю тебя до слёз" җырын башкара. Моңа тагын ни өстисең?