Мәктәптә соңгы көн

Җомга көнне район мәктәпләрендә укучылар өчен соңгы кыңгырау бәйрәме булды.
Традиция буенча тантаналы линейка 1 нче мәктәп территориясендә узды. Анда көн геройлары - чыгарылыш укучылары, әти-әниләр, почетлы кунаклар катнашты. Быел 52 укучы 11 нче сыйныфтан чыгарыла сыйныф җитәкчеләре - Н.Горланова һәм О.Красильникова. Тугызынчы сыйныфны 199 бала тәмамлый.
Район башкарма комитет җитәкчесе И.Привалов котлау һәм фатихаларын юллады.
- Сез - безнең киләчәгебез. Барлык планнарыгызның тормышка ашуын телим. Алда сезне зур тормыш, зур планнар көтә, - диде Игорь Анатольевич.
Мәгариф идарәсе начальнигы Р.Гайфуллина, директор урынбасары И.Денисова, беренче сыйныф укучылары котлауларга кушылды.
- Минем тормышымда дәрес, тәнәфес, парта буенча күршем башка булмаячак, - диде чыгарылыш укучылары исеменнән чыгыш ясаучы Александр Романов. - Түзем булганнары һәм монда алган тормыш мәктәбе өчен укытучыларыма рәхмәт белдерәм.
Вадим Романов һәм Эмилия Зыятдиновага 2012 елның соңгы кыңгыравын яңгырату хокукы бирелде. Кайчандыр үзләре дә шушы мәктәпне тәмамлаган ирле-хатынлы Никитиннар, З.Романова, Р.Баһаветдинова үз балаларына сокланып һәм дулкынлану белән карап тордылар.
- Без балаларыбыз өметләребезне акласыннар иде дибез, - дигән фикердә әти-әниләр.

3 нче мәктәпнең чыгарылыш укучылары учреждение янындагы мәйданга тантаналы линейкага тезелде.
11 нче сыйныфны тәмамлаучыларга карап, укытучылар һәм әти-әниләр күз яшьләрен көчкә тыеп торды.
- Минем 11 Б сыйныфында иң яхшы укучылар. Алар изге күңелле, максатка омтылучан, хезмәт сөючәннәр, - ди сыйныф җитәкчесе, тәҗрибәле остаз Люция Хөснетдинова.
20 чыгарылыш укучысының дүртесе - Влада Петрова, Аида Гулеева, Ләйсән Сабирова, Алина Ювакаева медальгә дәгъва белдерәләр.
- 14 бала химиядән имтихан бирә. Бу фәнне мин аларда 7 нче сыйныфтан укытам. Сез аларга карагыз әле: алар бит төз, озын гәүдәле. Күпләре фәннәрне яхшы үзләштерү өстенә, спорт белән дә актив шөгыльләнә, КВН төрле конкурс, олимпиадаларда җиңүчеләр, - ди ТР Атказанган укытучысы Илсөяр Зиннәтуллина.
- Балаларыбыз ничек үстеләр. Аларга аң-белем биргән, яхшы итеп тәрбияләүдә өлеш керткән укытучыларга рәхмәт, - диләр Резедә Гәрәева һәм Наилә Ювакаева.
Район башкарма комитет җитәкчесе Игорь Привалов исеменнән чыгыш ясаган урынбасар Павел Миронов чыгарылыш укучыларына изге теләкләрен җиткерде.
Мәгариф идарәсе начальнигы урынбасары Наталья Зырянова, педагоглар тәбрикләүләргә кушылдылар.
Традиция буенча беренче һәм өлкән сыйныфлар сувенирлар бүләк итештеләр.
Иң яхшы чыгарылыш укучыларына таныклык, Мактау грамотасы, диплом тапшырылды. Мәктәп вальсы белән тантаналы чара тәмамланды.