Менделеевск яңалыклары
  • Рус Тат
  • Әнисенең һөнәрен дәвам итеп

    Акушерлык хезмәтенә 35 ел гомерен багышлаган Мәрьям Халикулова октябрь башында күркәм юбилеен билгеләде. Мәрьям Гарафетдиновна әнисе Сөгъдә Имамовна үрнәгендә шәфкать туташы һөнәрен сайлый. - Без ул чорда Таҗыйкстанда яшәдек. Әни хезмәт куйган хастаханәгә еш барып йөрдем. Ак халатлы, сөйкемле, авыруларга ярдәм итүче әнием белән горурлана идем. Иптәшләремә дә аның турында...

    Акушерлык хезмәтенә 35 ел гомерен багышлаган Мәрьям Халикулова октябрь башында күркәм юбилеен билгеләде.
    Мәрьям Гарафетдиновна әнисе Сөгъдә Имамовна үрнәгендә шәфкать туташы һөнәрен сайлый.
    - Без ул чорда Таҗыйкстанда яшәдек. Әни хезмәт куйган хастаханәгә еш барып йөрдем. Ак халатлы, сөйкемле, авыруларга ярдәм итүче әнием белән горурлана идем. Иптәшләремә дә аның турында соклану хисләре белән генә сөйләдем. Сигезенче сыйныфны тәмамлау белән Курган-Түбә медучилищесына документларымны тапшырдым, - дип сөйли юбиляр.
    Һөнәренең нечкәлекләренә бу өлкәдә тәҗрибә туплаган коллегаларыннан өйрәнә. Сабыйга дөньяга килергә беренче мәртәбә булышуын, яшь әнидән дә ныграк дулкынлануын елмаеп искә ала.
    Тик Таҗыйкстандагы тыныч тормыш бер мизгелдә челпәрәмә килә. Гаиләгә ашыгыч күчеп китәргә туры килә. Төзелештә эшләгәндә фаҗигале һәлак булган әтиләре һәм авыр чирдән иртә дөньядан киткән әниләре мәңгегә монда кала.
    Мәрьям тормыш иптәше Ибраһим, кызлары Мәликә һәм Камилә белән 1992 елда әби-бабаларының тарихи ватанына - Татарстанга кайта. Хәзер өлкән кызлары Казанда яши, балалар бакчасында тәрбияче, икенчесе шәхси эшмәкәр, читтән торып Яр Чаллы сәүдә-технология институтында белем ала.
    - Шөкер, кызларым белән уртак тел табабыз. Мин аларга әни дә, сердәш тә, ярдәмче дә. Ә күп очракта алар миңа киңәшче, - дип шатланып сөйли Мәрьям Гарафетдиновна.
    Менделеевскига урнашкач, М.Халикулова ике елга якын балалар бакчасында шәфкать туташы хезмәтен башкара. Тик күңеле һаман элеккеге шөгыленә тартыла. Мөмкинлек булу белән, поликлиниканың гинекология бүлегенә урнаша.
    - Бала туу - могҗиза, ачылып бетмәгән сер. Кешелек дөньясын дәвам итүгә өлеш кертүем миңа зур канәгатьлек хисе бирә. Хатын-кызны ана булуга әзерләүдә медик та, психолог та, кайвакыт педагог та булырга туры килә. Хатын-кызларның төрлесе бар, әни булуга җиңел караучылар да җитәрлек. Мондый күренешләрнең еш очравы сагайта. Яшьләрнең сәламәтлеге дә мактанырлык түгел. Гинекологик авырулар күбәйде, чөнки кыз балалар салкын кышта да җиңелчә киенеп йөри, вакытында дөрес әхлакый тәрбия алмау төзәтмәс хаталарга китерә, - дип фикерләре белән бүлешә тәҗрибәле акушер.
    Мәрьям Гарафетдиновна хатын-кыз бәхете гаиләдә һәм туганнар белән тату яшәүдә дип уйлый. Сеңлесе Флүрә белән бакча үстерәләр, кышка запаслар туплыйлар. Алтын куллы Мәрьям ханым тегә, бәйли, төрле ташландык әйберләрдән эшләнмәләр иҗат итә.
    Коллегалары аны оста һөнәр иясе һәм уңай холыклы кеше буларак хөрмәт итәләр.
    - Киләчәктә дә хезмәтемә тугры калырга омтылам, чөнки һөнәремне чын күңелдән яратып башкарам, - ди М.Халикулова.
    Фәймә Вахриева

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: