Полиция Кыш Бабае

Шундый исемдә Бөтенроссия акциясе башланды. Аны берничә ел рәттән район эчке эшләр бүлеге хезмәткәрләре дә оештыра. Хәйрия акциясенең максаты-кыен тормыш хәлендә калган балаларга бәйрәм бүләк итү.

18 гыйнварга кадәр дәвам итәчәк акция кысаларында азкеремле, уңышсыз, күпбалалы гаиләләр һәм балигь булмаганнар эшләре комиссиясендә профилактик исәптә торган 62 балага яңа ел бүләкләре өләшенәчәк.

24 декабрьдә балигъ булмаганнар эшләре буенча төркемнең өлкән хезмәткәре Сергей Метальников җитәкчелегендә полициянең участок вәкиле Альберт Юнысов, балигь булмаганнар эшләре бүлеге инспекторы Алиса Әхмәтшина, 1 нче мәктәпнең "Максимум" үзидарә советы әгъзалары һәм редакция хезмәткәрләре Пушкин урамының 3 һәм 5 нче йортларында яшәүче һәм "Кама таңнары" приютында тәрбияләнүче балаларга татлы бүләкләр, йомшак уенчыклар, китаплар, кием-салымнар һәм уку-язу өчен кирәк-яраклар өләштеләр. Кыш Бабай һәм Кар кызы, малайлар һәм кызларны якынлашып килүче 2015 ел белән котлап, яхшы укырга, тәртипле һәм тәүфыйклы булып үсәргә дигән теләкләр юлладылар.

Барлык ата-аналар исеменнән Марина Красильникова һәм приют шәкертләре бүләкләр өчен рәхмәт белдерделәр.