Профессионалларга таянып

Ремонт-механика цехы начальнигы Айрат Миңнегалиевның хезмәт биографиясенең 25 елдан артыгы "Менделеевсказот" белән бәйле.
- Мин заводка 1988 елда котельный-механика участогы начальнигы булып килдем, - дип сөйли ул. - Бу вакытта көйләү-эшләтеп җибәрү эшләре бара иде һәм без көйләүчеләргә булыштык.
Ике елдан А.Миңнегалиевны ремонт-механика цехы начальнигы урынбасары итеп билгелиләр, 1992 елдан ул цехны җитәкли. Айрат Рәфисович коллектив белән бергә кризис чорын кичерә, ләкин предприятиене ташлап китү уе башына да керми.
- Мин бер урыннан икенчесенә күчеп йөрергә күнекмәгән, - ди ул һәм беренче елдан ук бергә эшләгән кешеләр турында җылы хисләр белән сөйли. Алар - авыр вакытта ярдәмгә килгән, көннең теләсә кайсы вакытында эшкә чыгудан баш тартмаган алтынчы разрядлы слесарь-ремонтчылар Венер Фәрхетдинов, Владимир Ильин, Николай Зотов.
Ремонт-механика цехы - җитештерү процессында алыштыргысыз үзенчәлекле звено. Планлы, агымдагы һәм цехлар заявкасы буенча ашыгыч эштән тыш, кайвакыт авария режимында эшләргә туры килә.
- Завод тәүлек буена эшли, гадәттән тыш хәл килеп чыкса, процесс кабаттан дәвам итсен өчен, без бар тырышлыкны куябыз, - дип сөйли А.Миңнегалиев. - Моның өчен 12-20 сәгать, кайвакыт ике тәүлек эшләргә туры килә.
Айрат Рәфисович җитәкчелегендә 35 кеше, нигездә тәҗрибәле һәм зирәк кадрлар. Алар кулы белән стандарт булмаган җиһазлар, җитештерү процессында кулланылучы күп кенә вак детальләр эшләнә.
Айрат Миңнегалиев коллегаларының һөнәри осталыгын, аларның уртак эшкә бирелгәнлеген, үзара аңлашып эшләүне уңышлы эшчәнлекнең нигезе дип саный. Җаваплы вазифа үтәүчегә ышанычлы тыл кирәк. Хатыны Елена Анатольевна тормыш иптәшенә дистә еллар ныклы терәк, ике кызы һәм оныклары яшәү һәм эшләүгә шатлык һәм илһам өсти.