Һәрвакыт иҗади эзләнүдә

Борынгы предприятие - Л.Я.Карпов исемендәге завод тарихын кемнәр тудыра? Үзегезгә кайчан да булса шундый сорау биргәнегез бармы? Җавап гади: һөнәрләренә тугры һәм хезмәт сөючән менделеевлылар, гипосульфит тозлары җитештерү цехы аппаратчысы Зоя Будрина кебек гади кешеләр. 2013 елдагы эшчәнлек нәтиҗәләре буенча ул һөнәре буенча иң яхшылар исәбенә керде.
Зоя Георгиевнага карап, бу нәфис ханымның химия заводының иң авыр цехларының берсендә аппаратчы булып хезмәт куюына ышану кыен. Язмабыз герое күпбалалы гаиләдә эштә чыныгып үсә. Зоя Георгиевна искә алганча, әнисе иртә вафат була, тормыш авырлыгы, балалар турында кайгырту әтисе җилкәсенә төшә. Педагогик училище тәмамлаганнан соң, Зоя мөдир Людмила Сергеевна Тунгускова җитәкчелегендә ун елдан артык 3 нче балалар бакчасында тәрбияче булып эшли. Соңрак химия заводына күчә.
- Аппаратчы Валентина Коновалова минем остазым булды, хәзер ул лаеклы ялда, - дип искә ала Зоя Георгиевна. - Сменабыз бик тату, шунлыктан теләсә нинди эшне булдырабыз.
- Цехта 13 ел эшләү дәверендә үзен уңай яктан күрсәтте: хезмәт сөючән, җаваплы, вазифаларын белә, - ди унынчы цех начальнигы Рудольф Гришин.
Улы Юрий ГОБ КДИ цехында киптерү аппаратчысы булып эшли. Кечесе Иван - Чаллы предприятиесендә электр һәм газ белән эретеп ябыштыручы.
Талантлы кеше бар яктан да сәләтле була. Бу гыйбарә язмабыз героена да туры килә. Кайвакыт, илһам килгәндә, Зоя ханым саламнан композицияләр ясый. Аның эшләре завод һәм шәһәрнең декоратив-гамәли сәнгать күргәзмәләрендә урын ала. Иҗатка мәхәббәт оста куллы әтисе Георгий Ибәтовтан бирелгән. Ул кәрҗиннәр үргән, өстәл, урындык, чана, чаңгы һ.б. шундый әйберләр ясаган.
- Тыңлаусыз саламнан ничек әйбер ясап була, сере нәрсәдә? - дип сораштырам.
- Бернинди сере юк. Теләсә нинди җитештерү процессындагы кебек, аерым технологияне үтәү кирәк. Басудан җыелган салам төнгә аш содасы салынган суда калдырыла. Аннан аны парларга, үтүкләргә кирәк, шул вакытта салам куллану өчен әзер. Хәзер инде фантазиягезне эшкә җигәргә генә кала.
Зоя Георгиевна үзе, гаиләсе, бигрәк тә сөекле оныклары өчен бәйләргә ярата.

Вәсилә Мортазина

Фото гаилә архивыннан