Сезне Амур угы кайда тотты

Алинә Бәдретдинова һәм Илнар Абзалов:

Алинә: Без әбием белән электричкада дачадан кайта идек. Минем янга яшь егет килде һәм телефон номерымны сорады. Аны минем бакча кыяфәтем дә, янәшәдә әби булуы да каушатмады. Тизрәк котылыйм дип, номерны бирдем. Танышуыбыз шулай башланды. Әлбәттә, ул соңыннан шалтыратты. Мөгаен, бу язмыштыр. Илнарны армиядән көттем. Хәзер без бергә. Гашыйклар көнен кафеда билгелибез. Сөеклемнең беренче бүләге - йомшак аю - йөрәгемә аеруча якын.

Снежана Дәүләтбаева һәм Эдуард Азин:

Снежана: Без Гассар исемендәге мәдәният сараенда узган брейн-рингта таныштык. Мине чарага яшьләр бүлеге линиясе буенча җибәргәннәр иде, ә Эдик - "Форпост" клубыннан, тәртип саклау өчен җавап бирә. Менә шундый эш романы килеп чыкты. Икенче ел очрашабыз. Теләсә нинди бәйрәм - сөеклеләребезне тагын бер кат котларга, күркәм бүләк ясарга сәбәп. Мондый сюрпризлар озакка истә кала.

Ольга һәм Михаил Сакара:

Ольга: Без институтта таныштык. Өченче курста Миша Америкадан кайтты һәм укуын безнең төркемдә дәвам итте. Шунда барысы да башланды да инде. Гашыйклар көнен икәү генә үткәрәбез, романтик кичке ашка төп ризыкны ирем әзерли. Яки романтик сәяхәткә чыгабыз. Мишаның 14 февральгә иң үзенчәлекле бүләге: җиде розадан букет һәм "Минем мәхәббәтем бу розаларның соңгысы белән үләчәк" дип язылган открытка. Мин ул вакытта югалып калдым, ничектер дөрес язмаган дип уйладым. Букетны игътибар белән тикшергәч кенә, бер розаның ясалма икәнен аңладым. 8 февральдә өйләнешеп, без үзебезгә иң зур бүләкне ясадык инде.

Алинә һәм Артур Гобәйдуллиннар:

- Безнең танышу тарихы эштә башланды. Икебез дә Алабугада бер коллективта хезмәт куябыз. Ярты ел очрашып йөрдек, 2012 елның 8 июлендә - Гаилә, мәхәббәт һәм тугрылык көнендә өйләнештек. Изге Валентин көнен өйдә билгелибез, бергәләп романтик кичке аш әзерлибез.

Бәйрәм уңаеннан барлык менделеевлыларга бәхет һәм мәхәббәт телибез. Үз ярларын тапканнарны Гашыйклар көне белән котлыйбыз. Ә эзләүдә булганнарга як-якларына игътибар белән карарга киңәш итәбез. Сезне бердәнбер һәм кабатланмас мәхәббәт кая көтүен кем белә...