Шахмат – акыллылар уены

Күптән түгел Халыкара шахмат көне билгеләп үтелде. Бу көнне шәһәрнең шахмат клубларында төрле турнирлар һәм мавыктыргыч чаралар узды. Аларда күпләр бик теләп катнашты һәм тәэсирләре белән уртаклашты.
Шахмат иле дип Һиндстан исәпләнә. Фарсы теленнән алынган шах мат "хакимлек итүче үлде" дигәнне аңлата. Шахматка кадәр V гасырда чатуранга уены булган. Россиядә шахмат IX-X гасырларда барлыкка килгән. Шул дәвердән ул интеллектуаллар арасында зур популярлык казана.
- Безнең шахмат белән мавыгуыбыз кечкенәдән башланды, - диләр 1 нче мәктәп укучылары.
- Балалар бакчасында уйнарга өйрәттеләр. Бу файдалы уен, интеллектны үстерә, - дип хәбәр итә Кристина Гыйльметдинова.
- Шахматта уйнарга бабамнан өйрәндем, - дип дәвам итә Регина Акулова. - Шахмат - логик фикерләүне үстерүче кызыклы уен.
Артём Калмыков һәм Павел Иванов җәй көне велосипедта йөрергә яраталар, әмма шахмат уенын да игътибарсыз калдырмыйлар.
Инваспортчы Максим Уткин шахмат белән кечкенәдән шөгыльләнә. Талантлы һәм сәләтле егет көчле рухлы булуы белән аерыла, үҗәтлеге яңа үрләр яуларга өнди.
- 90 нчы еллар башында телевидениедә ул кадәр күп программалар булмады, - дип сөйли Максим. - Мин нигездә "Культура" каналын карадым. Журналист Яков Владимирович Дамскойны еш күрсәттеләр, ул шахмат ярышлары турында сөйләде. Әтиемнән дә шахмат фигуралары турында сөйләвен үтендем. Шулай итеп уйный башладым, тора-бара осталыгымны чарладым. Бу өлкәдә минем тренерым - тормышын шахматка багышлаган һәм күп талантлы балалар тәрбияләгән Юрий Дмитриевич Дюжакин, Аның шәкертләре уңышлары һәм казанышлары белән шатландыралар.
Рөстәм Миңнегәрәев ярыш рухы оештыруда мөһим роль уйный.
- "Көч булса, акыл кирәкми" дигән әйтем дөрес түгел. Чөнки ныклы җилкәләрдә акыллы баш булса, тагын да яхшырак, - дип билгеләп үтә Рөстәм Рәисович.
- Шахмат - бу уенны яратучылар тормышының аерылгысыз өлеше. Әйтергә кирәк, шахмат уйнаганда алар яшәргә өйрәнәләр, яшәгәндә - уйнарга.
Уйнагыз, хәтерегезне, иҗади фикерләү һәм акыл сәләтегезне үстерегез!

Анжела Райсян

Автор фотосы