Менделеевск яңалыклары
  • Рус Тат
  • Сугыш ветераны юбилеен билгеләде

    Менделеевскида яшәүче сугыш һәм хезмәт ветераны Александр Матвеевич Коновалов шушы көннәрдә 90 яшьлеген билгеләде. Беренче дәрәҗә Бөек Ватан сугышы ордены, "Ленинград оборонасы өчен" медале белән бүләкләнгән Александр Матвеевичка башкарма комитет җитәкчесе урынбасары Павел Миронов Россия Президенты Владимир Путинның адреслы открыткасын, район башлыгы исеменнән бүләк тапшырды. Котлауларга Социаль яклау идарәсе начальнигы...

    Менделеевскида яшәүче сугыш һәм хезмәт ветераны Александр Матвеевич Коновалов шушы көннәрдә 90 яшьлеген билгеләде.
    Беренче дәрәҗә Бөек Ватан сугышы ордены, "Ленинград оборонасы өчен" медале белән бүләкләнгән Александр Матвеевичка башкарма комитет җитәкчесе урынбасары Павел Миронов Россия Президенты Владимир Путинның адреслы открыткасын, район башлыгы исеменнән бүләк тапшырды. Котлауларга Социаль яклау идарәсе начальнигы Әлфия Салаватуллина, хезмәт һәм сугыш ветераннары советы рәисе Любовь Сорокина, аучылар һәм балыкчылар җәмгыяте әгъзасы Нина Исмәгыйлова кушылдылар.
    Л.Карпов исемендәге химия заводында эшләп пенсиягә чыккан ветеранга предприятиенең профком рәисе урынбасары Татьяна Митшина да җылы тәбрикләү сүзләре җиткерде.
    Алтынчы сыйныфны тәмамлап заводка килгән үсмер, сугыш башлану турында ишетү белән, "яшем җиткән булса, мин дә немец илбасарларына каршы яуга китәр идем", - дип уйлый. 1942 елда унсигез яше тулган егетне фронтка алалар. А.Коновалов Ленинград оборонасында катнаша. Ул чорны ветеран күз яшьләре белән искә ала:
    - Блокада турында күп сөйлиләр, язалар, тик мин барысын үз күзләрем белән күргән солдат буларак әйтәм: ленинградлыларның, совет солдатларының батырлыгын бәяләп бетерерлек түгел. Блокаданың һәр көне сабырлыкка, мәрхәмәтлелеккә сыналу булды. Никадәр солдат башын салды, мин авыр яраландым, - дип хатирәләрен яңарта ул.
    1945 елның августында туган җиргә аяк баскан егет заводка слесарь булып урнаша. Тагын бер елдан гаилә кора. Тормыш иптәше белән өч кыз үстерәләр: Нина үзен балалар тәрбияләүгә багышлый, Галина - социаль үзәк белгече, Татьяна - һөнәре буенча бухгалтер, гаиләсе белән ерак Тобольскида яши. Алар өч ел элек әниләрен тәрбияләп соңгы юлга озатканнар. Хәзер әтиләрен кадерләп карыйлар.
    - Әти Бөек Ватан сугышында Җиңүнең 70 еллыгын дулкынланып көтә. Чордашларының күбесе мәрхүм. Актив кеше буларак, соңгы вакытта тормышы фатир бүлмәсендә узуына бик борчыла. Еш кына ялкынлы сугыш елларын, дусларын искә ала, - дип сөйли кызы Галина Александровна.
    Ә без, үз чиратыбызда, җиңү солдатына сәламәтлек, күңел тынычлыгы телибез.

    Фәймә Вахриева

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: