Торак пунктларда халык җыеннары үтте

Тихоновода яңа балалар бакчасы булачак
Бу турыда авылда халык җыенында Игорь Привалов хәбәр итте. Мәгариф министрлыгы департаменты гамәлдәге бакчаны авария хәлендә дип таныды.
- Ул киләсе елга социаль объектлар төзү буенча республика программасына кертеләчәк, - дип ассызыклады Игорь Анатольевич.
Җирлек башлыгы Екатерина Филатова 2014 елның беренче яртысындагы эшчәнлек турында сөйләде, авылда халык яшәешен тәэмин итү өчен барлык шартлар тудырылуын билгеләде.
- Мәктәп, ФАП уңышлы эшли, спорт мәйданчыгы куллануга тапшырылды, кибетләр челтәре бар. "Мехуборка", СЭС, "Жилэнергосервис" предприятиеләре белән турыдан-туры килешүләр нигезендә халык тиешле хезмәтләр белән тәэмин ителә.
Екатерина Юрьевна проблемалылар исәбендә юлларны ремонтлау, күпкатлы йортларда суүткәргеч һәм канализация системасын үзгәртеп кору мәсьәләләрен билгеләде.
Игорь Привалов районда иң эреләрдән булган авыл проблемаларының контрольгә алынуы турында ышандырды:
- Торак пунктларны төзекләндерү эше дәвам итәчәк. Безнең бурыч - республика президенты һәм "Бердәм Россия" партиясе инициатива биргән программаларга керү.
Яңа клубта очрашу
Камай авылында халык җыены яңа күпфункцияле үзәк бинасында узды.
Күләмле төзелештән тәэсирләнгән камайлылар авыл клубының уңайлы залында республика һәм район җитәкчелегенә, төзүчеләргә искиткеч бүләк өчен рәхмәт белдерделәр.
- Һәр очрашуда клуб төзүне таләп иттегез һәм объектның агымдагы елда барлыкка киләчәгенә ышанмадыгыз. Хәзер сезнең башка сорауларыгыз бардыр. Һәм бу дөрес тә - тормыш бер урында тормый, - диде район башлыгы Игорь Привалов, очрашуны ачып.
Ярты еллык эшчәнлек нәтиҗәләре белән җирлек башлыгы Илнар Ахунҗанов, полициянең участок вәкиле Садулла Гуломов таныштырдылар. Сәрия Нәбиуллина авыл халкы исеменнән җирлек башлыгына, район җитәкчесенә су белән тәэмин итү челтәрен үзгәртеп коруга йогынты күрсәткәннәре өчен рәхмәт белдерде.
- Суның һәр өйгә килүенә шатланып бетә алмыйбыз, элек аны колонкадан ташый идек, - диде ул.
Педагогик хезмәт ветераны Асия Мәҗитова сугыш чоры балаларына ташламалар билгеләү мәсьәләсен күтәрде.
- Сезнең үтенечне наказ буларак ТР Дәүләт Советы депутатларына җиткерермен, - дип ышандырды Игорь Анатольевич.
Җыенда шулай ук Вафирә Гыйззәтуллинаның кызының клубка халык җырчысы исемен бирү тәкъдиме тикшерелде. Камайлылар аны бердәм хупладылар. Авыл халкының мөрәҗәгате ТР Мәдәният министрлыгына юлланачак.