Төрмә җәзасына өч ел өстәде

Күптән түгел район суды гадәти булмаган эшне тикшерде: 10 нчы колониядә хөкем җәзасын үтәүче 37 яшьлек Чистай кешесе А.Хлемев власть вәкиленә карата физик көч куллана.
Җәза үтәү урыннарында булып чыкканнан соң, кайберәүләр анда башка эләкмәскә тырышалар, башкалар, киресенчә, "урладым - эчтем - зонага эләктем" дигән принцип белән яшиләр. Эш фигуранты беренче мәртәбә 2010 елда хөкем ителә. Алты айлык шартлы җәза срогын үтәгәндә, ул суд карарына буйсынырга һәм намуслы хезмәте белән гаебен акларга ашыкмый. Берничә тапкыр урлаша (9 очрак) һәм биш елга ирегеннән мәхрүм ителә. Җинаять эше материалларыннан күренгәнчә, үрнәк тәртибе белән аерылмаган А.Хлемев җәй көне тагын кыңгыр эш башкара.
Ул иртәдә учреждение администрациясе хезмәткәрләре хөкем ителгәннәрнең шәхси әйберләрен саклау урыны оештырырга ниятләнгән тулай торакның көнкүреш бүлмәсендә планнан тыш тикшерү чаралары үткәрәләр. Эчке тәртип кагыйдәләре буенча хөкем ителгәннәргә рөхсәтсез төрле корылмалар ясау тыела. Шунлыктан 10 нчы колония хезмәткәрләре җәза үтәүчеләрне үз әйберләрен алырга алдан кисәтеп, андагы шкаф һәм киштәләрне сүтәләр. Кайберәүләр, шул исәптә безнең криминаль тарих "герое"да, ризасызлык белдерәләр, цензурасыз сүзләр белән сүгенәләр. А.Хлемев көтмәгәндә хезмәткәрләрнең берсенә агач киштә белән ыргыта һәм аны җәрәхәтли, ярадан кан ага башлый. Моны күреп, хөкем ителгәннәр төрле якка таралышалар. Зыян күрүче башта учреждение медсанчастенә, аннан район үзәк больницасына мөрәҗәгать итә. Шаһитлар сөйләвенчә, бу шундый тизлек белән эшләнә, колония хезмәткәре реакция ясарга өлгерми кала.
Хлемевка карата җинаять эше кузгатыла. Ул үз гаебен танымый. Шуңа да карамастан, суд эш буенча җыелган материаллар хөкем ителүченең җинаять эшләүдә тулы күләмдә гаепле булуын дәлилли дип саный. Суд А.Хлемевны катгый режимлы колониядә өч елга ирегеннән мәхрүм итү турында карар чыгара.
Лидия Коровина, федераль судья,
Роза Шәрәфиева, үз хәбәрчебез