Туган тел – мәхәббәт теле!

21 февральдә Туган тел көне билгеләп үтелә. Корреспондентыбыз Вәсилә Мортазина "Сезнең өчен нинди тел туган тел булып санала?" дигән сорау белән район халкына мөрәҗәгать итте.
Лариса Павлова, Монаш урта мәктәбенең 11 нче сыйныф укучысы:
- Минем өчен туган тел - удмурт теле, без өйдә шул телдә аралашырга тырышабыз. Туган тел буенча республика олимпиадасында ике ел рәттән призлы урынны алдым. Ышанып әйтә алам, җиңүләремдә удмурт теле һәм әдәбияты укытучысы булган әниемнең өлеше зур. Мәктәптә, туган телдән тыш, без рус, татар һәм инглиз телләрен өйрәнәбез.
Геннадий Герасимович, эксперт эше буенча баш табиб урынбасары:
- Кеше уйлый, сөйләшә, яза торган тел аның өчен туган тел дип саныйм. Минем өчен рус теле шундый. Тумышым белән Оренбург өлкәсеннән, ә фамилиям белоруссиянеке. Татарстанда күптәннән яшим, кайвакыт, сөйләшкәндә татарча сүзләр куллану теләге туа. Республика күпмилләтле, шунысы куандыра, Сабантуй, Масленица кебек бәйрәмнәрне бергәләп үткәрәбез.

Валентина Мамакова, Иске Гришкин авыл җирлеге башлыгы, "Бигәшкәй" фольклор ансамбле җитәкчесе:
- Туган тел көне кебек даталар булу бик яхшы. Мин керәшен кызы, ата-бабаларыбызның туган теле - татар теле. Безнең авылда төрле милләт вәкилләре тату яшиләр, милләтара никахлар да теркәлә. Еш кына икенче яртыңны йөрәктән чыккан хисләр аша сайлыйсың. Ә яратучы йөрәкләр һәрвакыт бер телдә - мәхәббәт телендә сөйләшә.

Алсинә Шахвердян, 1 нче мәктәпнең 8В сыйныф укучысы:
- Минем өчен туган телнең кайсы тел булуын әйтүе кыен. Алар берничә: рус, татар, әрмән, мәктәптә инглиз телен канәгатьләнү хисе белән үзләштерәм. Ышанам, бу телләрне камил белү кебек теләгем кайчан да булса тормышка ашар, түземлек һәм хезмәт уңай нәтиҗә бирә, дип юкка гына әйтмиләр.

Сүз уңаеннан
2010 елдагы Бөтенроссия халык исәбен алу нәтиҗәләре буенча безнең районда 30377 кеше яши: шул исәптә татарлар - 16033, руслар - 10811, удмуртлар - 1332, марилар - 1227, чувашлар - 195, башкортлар - 168, украиннар - 125, мордвалар - 31 кеше.