“Тын ау”: ял да, файда да

- Гөмбәне мәктәп елларыннан бирле җыям, - дип бүлешә "Менделеевсказот" ҖЧҖнең биологик чистарту корылмалары цехы операторы Зөһрә Гайнанова. - Мин Камайда яшәдем, ә андагы урманнар гөмбәгә бай, шуңа күрә кайсында ниндие үскәнен кечкенәдән беләм. Җирән гөмбәне кышка җитәрлек әзерләдем. Хәзер агач төбендә үсүче баллы гөмбә (пеньковые опята) күп, шуны җыям, тозлыйм, икра ясыйм. Бер рецепт та тәкъдим итәм: баллы гөмбәне яхшылап юарга, суда 40 минут кайнатырга. Салкын суда чайкатып, маринадка салып кайнатырга. Маринад: 1 литр суга 8 аш кашыгы 9% лы аш серкәсе, 1,5 аш кашыгы шикәр комы, 1 аш кашыгы тоз, 1 лавр яфрагы, 4әр түгәрәк кара һәм ачы борыч, 3 канәфер. Маринадта гөмбәләрне 15-20 минут кайнатып, стериль банкаларга тутырырга.

Медиклар гөмбәне сирәк кулланырга киңәш итә. Составындагы аксым күләме буенча ит белән бертигез дәрәҗәдә йөрсә дә, гөмбә организм тарафыннан авыррак үзләштерелә. Ашказаны асты бизе, бавыр авыруларыннан интегүчеләргә аннан бөтенләй тыелырга кирәк. Шулай ук балаларга ашатмагыз.

Гөмбә җыюга җитди карау зарур. Ашарга яраклылары белән беррәттән агулылары да үсәргә мөмкин икәнен онытырга ярамый. Роспотребнадзор статистикасы буенча, сезон башланганнан бирле гөмбәдән 14 кеше агуланган, Менделеевскида бер очрак теркәлгән.

- Гөмбә белән агулану билгеләре башка агуланудан аерылмый диярлек. Шуңа күрә беренче ярдәм чаралары да охшаш: иң элек ашказанын юдырту. Аннан зыян күрүчегә чәй эчереп, ашыгыч ярдәм чакыртырга кирәк, - диде баш табибның эпидемиология мәсьәләләре буенча урынбасары Дамира Кашапова.

Гөмбә җыюда тәҗрибәгез һәм белемегез җитәрлек икән, "тын ау" сезнең өчен ял да, файда да булачак.