Төзүче – хатын-кызлар һөнәре

Бу өлкәдә 39 ел хезмәт куючы Лидия Старкина Төзүчеләр көнен тулы хокук белән билгеләп үтә.
- Әлегә кадәр хезмәтемне яратам, - дип раслый Лидия Михайловна, - чөнки без кешеләр өчен изге эш башкарабыз.
Лениногорск районында туып үскән Лида һөнәр училищесына дус кызы үрнәгендә керә. 1975 елда 13 яшь штукатур-буяучы билгеләнү буенча Менделеевскига килә.
Л.Старкина 15 елга якын "СМУ-35" оешмасында эшли. Бригадир Мәликә апа Әскарова яңа килгәннәргә һөнәрнең үзенчәлекләренә төшенергә булыша.
Нинди объект бигрәк тә хәтерендә калды дигән сорауга, Лидия Михайловна болай дип җавап бирә:
- Билгеле инде, Гассар исемендәге мәдәният сарае.
Мәдәният үзәген куллануга тапшыру менделеевлылар өчен зур вакыйга була. Штукатур-буяучылар бригадирының өлеше дә лаеклы билгеләп үтелә. Мәдәният сараен ачу тантанасында Лидия Михайловнага сүз бирелә.
- Бригада өчен бу эш осталыкка өйрәнү мәктәбе булды, - ди ул.
Лидия Михайловна катнашында Иске Гришкин, Бәзәкә, Турай, Монаш авылларында мәктәп һәм балалар бакчалары, шәһәрдә йортлар төзелә.
1987 елда коллегасы Надежда Съёмщикова белән чит илгә командировкага - Ливиядә компрессор станциясе төзергә баралар. Анда булган ярты ел вакытны алар аеруча тирән хисләр белән искә алалар.

Төзүче хезмәте беркайчан да җиңел булмады, техник прогресска да карамастан, ул һаман да шулай булып кала. Бар ышаныч - ныклы кулларга, осталык һәм һөнәрне яратуга бәйле.
- Менделеевскига килгән 13 кыздан мин һәм Әлмирә Натфуллина гына калдык, икебез дә әлегә кадәр үз һөнәребезгә тугрылыклы.
ТРның атказанган төзүчесе Лидия Михайловна бүгенге көндә "Менделеевсказот" заводының ремонт-төзелеш цехында эшли.
Балалары Оксана һәм Владислав әйтүенчә, әниләре - хезмәт сөюче, изге күңелле, зирәк, тирән хөрмәткә лаек. Ул балаларын, оныкларын ярата, бакча участогында канәгатьләнү хисе белән эшли, нарцисс, лалә, лилия, дәлия чәчәкләре анда үзенчәлекле урын били.
Без аның һөнәри бәйрәмен ничек билгеләп үтәргә ниятләве турында кызыксынып сорадык.
- Коллегаларым белән кафега барабыз, - диде Лидия Михайловна.