Менделеевск яңалыклары
  • Рус Тат
  • Укучы-газета

    Йөрергә куркыныч һәм караңгы Евгения Сорвина шәһәр урамнарын яктырту проблемасын күтәреп, редакциягә хат юллаган. "Өч яшьлек балам иҗат үзәгенә йөри. Шөгыльләр кичке сигезенче яртыда гына тәмамлана. Без балаларыбыз белән караңгы урамнан кайтырга мәҗбүр: атларга куркыныч, аяк астында чокыр-чакырлар, су, хуҗасыз этләр дә күп. Алдагы елларда шәһәр яхшырак яктыртыла иде. Минен...

    Йөрергә куркыныч һәм караңгы
    Евгения Сорвина шәһәр урамнарын яктырту проблемасын күтәреп, редакциягә хат юллаган.
    "Өч яшьлек балам иҗат үзәгенә йөри. Шөгыльләр кичке сигезенче яртыда гына тәмамлана. Без балаларыбыз белән караңгы урамнан кайтырга мәҗбүр: атларга куркыныч, аяк астында чокыр-чакырлар, су, хуҗасыз этләр дә күп.
    Алдагы елларда шәһәр яхшырак яктыртыла иде. Минен фикеремне менделеевлыларның күбесе хуплый. Урамнарда яктырак булсын!" - дип яза Евгения.
    Газета укучыбызның хаты район Башкарма комитетына юлланды.
    Тукталышлар һәм бала тудыру йорты турында
    Тукталышлар торышы проблемасын газета битләрендә күтәрсәгез иде.
    Алар яктыртылмый, поселоктагысыннан тыш, калганнарында чүп-чар җыештырылмый. Поселоктагы тукталышның урнасын да кибет хезмәткәрләре генә тәртиптә тота. Шәхси транспорт куелу сәбәпле, автобусларга туктау, машиналарны урап узу кыенлаша. ЮХИДИ хезмәткәрләре моңа игътибар итсеннәр иде.
    Тагын бер проблема. Шәһәрдә бала тудыру йорты ябылды. Хәзер булачак әниләрне күрше шәһәрләргә илтергә туры килә. Ә бу гади мәсьәлә түгел - бар кешенең дә кул астында машинасы юк, кайвакыт ышаныр кешесе дә. Өлкән яшьтәгеләрне бу хәл гаҗәпләндерә, чөнки хәтта сугыш елларында да бала тудыру йорты эшләде.
    Николай Архипов
    Изге эшкә салават
    Тойгуҗа авылында зират чистарту өмәсе булды. Шунысы куанычлы, анда яшьләр актив катнашты.
    Айдар Сафин, Алмаз Садыйков, Ильяс Хәбибрахманов, Илдар Гарифуллин тырышып эшләделәр. Роберт Нәбиуллин, Камил Хуҗин, Нигъмәтҗан Ситдыйков аларның остазлары булды. Хатын-кызлар чыбык-чабык җыйдылар, территорияне чүп-чардан арындырдылар. Кешелекнең мәңгелек йорты кышка чистарынып керде. Авыл халкы зират коймасын төзекләндергән Айдар һәм Алмаз Садыйковларга аеруча рәхмәтле. Мондый күркәм гамәл Песәй, Бәзәкә авылларында да башкарыла. Зират чистарту - күңеле мүкләнмәгән һәр кешенең изге бурычы дип исәплим.
    Эльза Хәбибрахманова, Тойгуҗа авылы
    Караклар йокламый
    Тойгуҗа һәм Рус Сарсазы авыллары халкы, берәр кая йомышлары төшсә, Әгерҗе-Чаллы трассасына чыга.
    Еш кына узып-китеп йөрүче машиналарны көтеп минутлар түгел, сәгатьләр үтә. Һава торышы да гел кулай гына килми: көчле җил дә исә, тоташ яңгыр яки кар да ява, эссе, салкын чаклар да була. Халык соравы буенча юл буена тукталыш ясаганнар иде. Юлчылар моңа сөенергә дә өлгерми калдылар, караклар тукталышны "чишендереп" тә киттеләр. Угрылар йокламый шул, төнлә эш итәләр. Кемнәрдер бирегә капчык-капчык чүп тә ташлап китә. Бу тәртипсез бәндәләрне тиемле җавапка тартасы иде.
    Тойгуҗа, Рус Сарсазы авыллары халкы

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: