Менделеевские новости
  • Рус Тат
  • Ул еллар хәтердән җуелмый

    22 июньдә туган якны өйрәнү музее янындагы мәйданда Бөек Ватан сугышы башлануга 71 ел тулу уңаеннан митинг оештырылды. Анда сугыш һәм тыл ветераннары чакырылды. Музей хезмәткәре Ф.Габдрахманова сүзләренә караганда, әлеге чараны биредә үткәрү очраклы түгел. Илебезгә имин тормыш бүләк иткән ветераннарның тормыш юлы завод идарәсе һәм "Коммуна" театры белән бәйле....

    22 июньдә туган якны өйрәнү музее янындагы мәйданда Бөек Ватан сугышы башлануга 71 ел тулу уңаеннан митинг оештырылды. Анда сугыш һәм тыл ветераннары чакырылды.
    Музей хезмәткәре Ф.Габдрахманова сүзләренә караганда, әлеге чараны биредә үткәрү очраклы түгел. Илебезгә имин тормыш бүләк иткән ветераннарның тормыш юлы завод идарәсе һәм "Коммуна" театры белән бәйле. Өлкән буын вәкилләре өчен бу җирләр изге һәм кадерле, хатирәләргә бай.
    - Бөек Ватан сугышы беркайчан да хәтерләрдән җуелмас. Бондюг районыннан 1941 елда 3047 кеше илебезне саклау өчен яуга китте. Озакка сузылган дүрт ел эчендә фронтка алынган 8278 якташыбызның 5123е туган якларына кайта алмады, - дип башлады сүзен алып баручы В.Никифоров.
    Район җитәкчесе И.Привалов үз чыгышында сугыш афәтенең һәр гаиләгә кагылуын билгеләп үтте.
    - Ватан өчен һәлак булган бондюглылар алдында баш иябез, җиңү белән кайткан ветераннарга һәм тыл хезмәтчәннәренә, район үсеше өчен фидакарь хезмәт куйганнарга олы рәхмәтебезне белдерәбез, - диде Игорь Анатольевич.
    1941 елның 22 июне сугыш һәм хезмәт ветераны, Татарстанның атказанган укытучысы, шәһәрнең мактаулы гражданины В.Георгиевскийның йөрәгенә тирән уелган.
    - Минем яшь чагым. Мәктәптә чыгарылыш кичәсе узды, киләчәккә булган якты хыялларыбызны челпәрәмә китереп, Бөек Ватан сугышы башланды. Атна саен бондюглылар бер-бер артлы "Коммуна" театры яныннан фронтка киттеләр. Аларның һәрберсенә бер буханка кара ипи бирәләр иде. Әлеге икмәкне аз-азлап кына кулландык, озаграк сакларга тырыштык, чөнки бу ризык безне туган як белән бәйләп торучы бердәнбер җеп иде. Ул безгә көч бирде, күңелдә патриотлык хисләре һәм Ватаныбызга карата мәхәббәт тудырды, - дип хатирәләре белән уртаклашты Владимир Владимирович. - Исемдә, авылдан бер ир-атны тормыш иптәше һәм улы яу кырына озата иде. Китәр алдыннан ул букчасыннан ипи һәм кечкенә генә банкада акмаен чыгарып, бер кыерчык икмәккә май ягып ашый башлады. Ә мин уйларга бирелдем: бу кешегә сугыштан исән-имин кайтып тагын шулай туган җир ризыгын кулланырга насыйп булырмы икән?!
    Районда сигез Советлар Союзы Герое бар, алар турында менделееевлылар гына түгел, башка шәһәр кешеләре дә белсеннәр иде, чөнки якташларыбыз моңа лаек.
    Киләчәктә беркайчан да күгебезне сугыш сөреме капламасын, дөньялар имин булсын.
    Нравится
    Поделиться:
    Реклама
    Комментарии (0)
    Осталось символов: