Урам – сынау урыны

Урамда җәрәхәт алучылар саны арта. Моның сәбәбе - һава шартлары һәм юлларның тиешле торышта булмавы, дип исәпли зыян күрүчеләр. Аларның кайберләре белән без больницада сөйләштек.
Хирург кабинеты янында озын чират. Кешеләр утырып, басып, стенага сөялеп, сабыр гына табиб-хирург Екатерина Колобкованың кабул итүен көтәләр. Екатерина Сергеевнаны эшеннән аерырга базмадык, әмма пациентлар белән сөйләштек.
Анна Костина Монайдан килгән. Хатын баш авыртуына зарлана.
- Ял көннәрендә таеп егылдым, башым белән бәрелдем. Больницага мөрәҗәгать итәргә теләмәгән идем, ләкин баш өзлексез авырта, кан басымы уйный. Баш мие селкенүгә шикләнәм, - дип кайгыра Анна Яковлевна.
- Сез тимер юл аркылы чыгу күпере янындагы чатта булдыгызмы? - дип сүзгә кушыла Антонина Сәхабетдинова. - Анда калын боз катламы, аяк басарга да куркыныч. Ә бу интенсив хәрәкәт урыны, балалар үтеп йөри, кайберләре спорт мәктәбенә, икенчеләре коррекция мәктәбенә, бик күпләр Тын Тауга.
- Артём өченче мәктәп янында егылды, аяк тубыгын каймыктырды, авырдан йөри, - дип бүлешә әнисе Ануш Арутюнян.
- Күпләр хирургка талонга мөрәҗәгать итә. Еш кына бүлектән икенче хирургны чакырталар, - ди медицина теркәүчесе Светлана Чернова.
Исемен атарга теләмәгән ир яра бәйләү кабинетына чират көтә.
- Менделеев урамында яшим, 10 көн элек подъезд янында җайсыз егылдым. Хәзер аягым гипста, култык таягы белән өч атна йөрергә кирәк. Юллар тоташ шугалак кебек, - дип уфтана ул.
Больница юлына ком сибелгән иде. Бурмистров урамының 9 нчы йорты ишегалдында Татьяна Бигачёва йорт яны территориясен боздан чистарта.
- Миңа биш йорт беркетелгән, - дип сөйли коммуналь хезмәткәр. - Көн саен территориягә ком сибәм, башкача булмый. Бу йортларда нигездә өлкәннәр яши, алар өчен мондый һава торышы - чын сынау.
Йортта яшәүче Наил Габделбариев ишегалды себерүчене мактый. Әмма ир урамның тиешенчә яктыртылмавына канәгатьсезлеген белдерә.
- Биредә кичләрен бер генә фонарь да янмый. Аяк асты тая һәм караңгы!
Без комментарий өчен шәһәр Башкарма комитеты җитәкчесе Рафаэль Сабитовка мөрәҗәгать иттек. Аның сүзләренчә, юлларны чистартуга "Комфорт Успех+" ҖЧҖ җаваплы. Предприятие директоры Әзһәр Каюмов аңлатуынча, шәһәр урамнарына атнага ике тапкыр ком һәм тоз катнашмасы сибелә. Кирәк булганда, юлларны чистартуга техника чыга.
- Бюджетта шәһәрне җыештыруга салынган акчаны үзләштердек, хәзер очны-очка ялгап эшлибез, - ди Әзһәр Мөнәвирович. - Белгечләр җитешми, коммуналь служба хезмәткәрләренең эш хакы түбән. Бу картинаны һава торышының көйсезлеге тулыландыра.
Мондый һава шартларында юлларда сак булырга кирәк. Тайгак юлда гәүдә тигезлеген югалтканда белгечләр чүгәләргә куша - шулай итеп сез егылу биеклеген киметәсез. Җәрәхәт алу белән, кичекмәстән табибка мөрәҗәгать итегез. Хәлне үз көенә калдырсаң, азагы аяныч тәмамланырга мөмкин.

Вәсилә Мортазина
Автор фотосы