Менделеевск яңалыклары
  • Рус Тат
  • Ветеран котлаулар кабул итте

    Районда олуг юбилейлары уңаеннан сугыш ветераннарына һәм тыл хезмәтчәннәренә Россия Президенты Владимир Путинның котлауларын тапшыру дәвам итә. Күптән түгел район башлыгы Игорь Привалов исеменнән аның урынбасары Рөстәм Хәбибуллин, социаль яклау идарәсе хезмәткәре Зөлфирә Сөләйманова һәм санитария-эпидемиология станциясеннән Валерий Якимов җитәкчелегендәге коллегалары котлау белән хезмәт һәм тыл ветераны Мәрзидҗә Төхватуллинада булдылар....

    Районда олуг юбилейлары уңаеннан сугыш ветераннарына һәм тыл хезмәтчәннәренә Россия Президенты Владимир Путинның котлауларын тапшыру дәвам итә.
    Күптән түгел район башлыгы Игорь Привалов исеменнән аның урынбасары Рөстәм Хәбибуллин, социаль яклау идарәсе хезмәткәре Зөлфирә Сөләйманова һәм санитария-эпидемиология станциясеннән Валерий Якимов җитәкчелегендәге коллегалары котлау белән хезмәт һәм тыл ветераны Мәрзидҗә Төхватуллинада булдылар.
    Бу көнне аңа 95 яшь тулды. Мәрзидҗә әбинең сау-сәламәт, көр күңелле булып калуы куандыра.
    - Сез сынауларга бирешмичә, тормышны сөеп яшисез. Исәнлектә-иминлектә яшь буынга үрнәк булып, озак гомер кичерегез, - дип теләкләрен җиткерделәр кунаклар.
    Юбилярның бәйрәм табынына үз куллары белән әзерләгән бәлеш чыгаруы бөтенесен шаккаттырды.
    - Бәхетле, тыныч тормышның тәмен белеп яшим. Аллаһы Тәгалә озын гомер биргән, шөкер. Табигатем буенча мин көрәшче, шулай булмаса, гомер юлында очраган авырлыкларны җиңә алмас идем. Әти-әнием тырышлыгы белән Бәзәкәдә мул тормышта яшәдек. Тик, "кулак" исеме тагып, гаиләбезне таркаттылар, хәерче иттеләр. Шуннан соң кара кайгы суын күп чөмерергә туры килде. Ләкин горур калдык, баш имәдек, әле һаман да бирешергә исәп юк, - ди тормыш мизгелләрен искә алып ветеран.
    Мәрзидҗә Гатаулловна сугыш башланган елда Тын Таудагы медицина пунктына санитар булып урнаша. Үҗәт, зирәк кызга озакламый укырга юллама бирәләр. Бондюг профилактика бүлегенә дезинструктор булып эшкә кергән белгеч шушы өлкәдә кырык елга якын хезмәт куя.
    Татарстан Финанслар министрлыгында хезмәт куеп лаеклы ялга чыккан кызы Сания Әхмәдуллина, бала чакларын искә төшереп, болай диде:
    - Әти белән яшәгән вакытны бик ачык хәтерләмим, миңа биш яшь тулганда гаилә таркалган. Әнием зифа буйлы, чибәр, сөйкемле булды. Гомер буе химикатлар белән эшләде. Бердәнбер якын кешемнең сәламәтлеге өчен бик борчыла идем. Хезмәт сөючән, белемгә омтылучан, туры сүзле, гадел буларак миндә дә шул сыйфатларны тәрбияләргә тырышты.
    Җәй айларын әни безнең Казан артындагы бакчада уздыра. Аңа табигать кочагында, җиргә якын булу бик ошый. Яраткан оныгы Динара (Президент Аппаратында бухгалтер), оныкчыгы Диана белән аралаша. Ә көзен яңадан күңеленә якын Менделеевскига кайта. Быел да, 9 май бәйрәмен билгеләп үткәч, үзебезгә алып китәчәкбез. көчле рухлы, акыллы киңәшләр бирүче әни-әбиебез безгә кадерле.
    Унбиш ел Мәрзидҗә әбигә ярдәм күрсәтүче социаль хезмәткәр Линда Цыгвинцева да әңгәмә кушыла,
    - Озак еллар дәвамында аралашу безне туганлаштырды. Мин аны ярты сүздән аңлыйм. Тормыш авырлыкларына, сырхауларга бирешмичә, оптимист булып калуын хөрмәт итәм. Мине үзе әзерләгән беленнәр белән сыйлый. Ул мөмкин булганча хәрәкәтләнергә тырыша, "яткан таш астыннан су акмый", дип кабатларга ярата.

    Фәймә Вахриева

    Рәис Сәхапов фотосы

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: