Ветераннар дөньяда тынычлык яклы

Чәршәмбе көнне район ветераннар советында ветераннар хәрәкәте активистларының киңәйтелгән утырышы булды.
Очрашуда катнашучылар, Украинадагы вакыйгалар өчен борчылу белдереп, район халкы арасында мәгълүмати-сәяси грамотасызлыкны бетерү буенча инициатива белән чыктылар.
- Хәрби хәрәкәтләргә китергән Украинадагы катлаулы хәл, зур сугыш чыкмасын өчен конфликт булган территориягә гаскәрләр кертүне тыючы Россия Президенты Владимир Путинның үлчәнелгән сәясәте турында аңлатма иң элек әле дөньяга ныклы карашы формалашмаган яшьләргә кирәк. Өлкән буын кешеләре үз җилкәләрендә күп михнәт кичерделәр һәм, Россия белән Украина арасында сугыш башланса, аның нәрсәгә китерәчәген яхшы аңлыйлар. "Без бердәм булганда җиңелмибез" - безнең якташларыбыз буыны тормыш буйлап шундый лозунг белән атлады. Ул бүген дә популярлылыгын югалтмый, - дип ассызыклады шәһәр Советы рәисе урынбасары, ТР Дәүләт Советына депутатлар сайлау буенча штаб начальнигы Илсөяр Гобәйдуллина.
"Межрегионгаз-Казан" ЯАҖ генераль директоры киңәшчесе Рөстәм Гафаров тема буенча үз фикерен белдерде.
Ветераннар Украина качаклары өчен әйберләр җыюны оештыру тәкъдиме белән чыктылар.
- Кабул итү пунктын без ветераннар советы бинасында урнаштыра алабыз, - диде рәис Любовь Сорокина.
Җыелганнар бу тәкъдимне хуплады.
Очрашу барышында "Бердәм Россия" партиясенең җирле бүлекчәсе башкарма комитеты җитәкчесе Клавдия Смирнова Татарстанда "Халык җыены" исемле яңа проектның гамәлгә ашырыла башлавы турында мәгълүмат бирде.
- Халык җыеннарының максаты - яшәеш белән бәйле проблемаларны һәм мәсьәләләрне тыңлау, шулай ук җирле территорияләрне һәм республиканы үстерү буенча тәкъдимнәрне кабул итү. Алар киләсе биш елга "Бердәм Россия" партиясе гамәлләре программасына кертеләчәк, - диде Клавдия Ивановна.
Ветераннар республика йогынтысы белән хәл итәргә кирәк булган берничә проблеманы билгеләп үттеләр.
- Шәһәргә вокзал һәм мунча кирәк. Шулай ук халык сыйфатлы медицина хезмәтенә мохтаҗ, - диләр алар.
- Иртәме, соңмы, бу проблемалар хәл ителәчәк. Иң мөһиме - җирдә тынычлык һәм тотрыклы икътисадый хәл булсын.
Дөньядагы глобаль проблемалар фонында безнекеләр алай ук кискен түгел кебек.
Кайберләрен, мисал өчен, территорияне төзекләндерүне зур чыгымнарсыз, күмәк көч белән хәл итәргә була. Бер мисал китерәм: йорт янында чәчәк түтәле ясадым, ә аларны тәрбияләүдә ярдәмчеләр табылмады. Клумбаларга еш кына машина куялар. Моны ничек атарга? Тәртипле булу кагыйдәләрен тәрбияләргә кирәк, шул вакытта низаглар да булмас, - диде хезмәт ветераны Тәскирә Галеева.