"Өй каршында үскән өянкеләр яшьлегемне хәтерләтәләр..."
Песәй авылында яшәүче Рәфыйкова Минерәисә Сәлим кызына 12 июльдә 90 яшь тулды. Ул - озын хезмәт юлы узган, шул дәвердә бик күп балалар тәрбияләгән хөрмәтле якташыбыз. Рәисә апага ихлас тәбрикләү сүзләрен һәм истәлекле бүләкләрне район башлыгы урынбасары Рөстәм Хәбибуллин, ветераннар советы рәисе Любов Сорокина, Песәй җирлеге башлыгы Фәнил Минегәрәев, "Чулпан"...
Песәй авылында яшәүче Рәфыйкова Минерәисә Сәлим кызына 12 июльдә 90 яшь тулды.
Ул - озын хезмәт юлы узган, шул дәвердә бик күп балалар тәрбияләгән хөрмәтле якташыбыз. Рәисә апага ихлас тәбрикләү сүзләрен һәм истәлекле бүләкләрне район башлыгы урынбасары Рөстәм Хәбибуллин, ветераннар советы рәисе Любов Сорокина, Песәй җирлеге башлыгы Фәнил Минегәрәев, "Чулпан" балалар бакчасы тәрбиячесе Зәкия Минегәрәева һәм туганнары, якыннары җиткерде.
Машина асфалт юлдан җилдерә генә. Без авылга керәбез. Юбиляр яши торган йорт Үзәк урамда. Хәер, аны Мөгаллимнәр урамы дип әйтергә дә була. Бу урамда гомерен мәгарифкә багышлаган кешеләр - укытучылар Гайнелҗинан апа Шәрифуллина, Мәрдитҗә апа Арсланова, Фаик абый Минрахмановлар яшәде.
Рәисә апаның балалар бакчасында тәрбияче булып эшләгәнен генә беләм. Ләкин бүген аның биографиясенең бик күп үзенчәлекләре дә мәгълүм булды.
Капка төбенә кунакларны каршыларга балалары чыккан. "Әйдәгез, узыгыз!" дип алар безне өйгә алып кереп китте. Җыйнак авыл йорты. Диванда матур күлмәкләрен киеп Рәисә апа утыра. Янәшәсендә каенсеңлесе Мәрьям апа Рәфыйкова. Гомер диген ә?! Әле кайчан гына Минзәлә педагогия училищесын тәмамлап, бирегә эшкә кайткан иде бит ул. 1944 ел. Сугыш бетмәгән... Шул авыр елларда башлана аның хезмәт биографиясе. Балалар бакчасы дигән исем генә. Сабыйларга утырырга - урындык, ятарга карават юк. Уенчык дигәнен тәрбияче кыз төн утырып үзе әзерли. Кәгазьдән, чүпрәктән, саламнан - кул астында нәрсә бар, шуннан.
Сүзгә Менделеевск шәһәреннән кайткан туганы Илгизәр Тимергалиева кушыла:
- Рәиса апа Бәзәкәдә туып-үскән кыз ул. Минем әниемнең бертуган абыйсы - Искәндәр аның тормыш иптәше иде. Алар 1949 елда өйләнештеләр. Искәндәр абый колхозның алдынгы механизаторы булды, бик матур җырлый иде.
- Әтиебез 41 яшендә вафат булды. Без әнигә дүрт бала калдык. Миңа ул чакта 12 яшь иде. Әтине җирләгәч, бер төндә әнинең чәче ап-ак булды, - дип ачыклык кертә кызы Вәсилә.
Дүрт баланы үстереп аякка бастыру хатын-кыз иңенә төшә. Башка кияүгә дә чыкмый, иренә һәм яшьли сайлаган һөнәренә тугры кала. Лаеклы ялга чыкканнан соң да Песәй мәктәбендә озайтылган көн группасында эшчәнлеген дәвам итә ул.
Уллары Илдар,Фирдәвес, кызы Вәсилә гаиләләре белән хәзерге көндә Яр Чаллы каласында яши. Кызганыч, араларында Илшат кына юк. Әтисе кебек ул яшьли гүр иясе була.
- Рәисә апа үзенең бөтен барлыгын, көчен, вакытын, сәламәтлеген сабыйлар тәрбияләүгә багышлады. Үзем дә шул өлкәдә 30 елдан артык эшләгән кеше буларак, бу һөнәрнең авырлыкларын бик яхшы беләм. Нәниләр белән бик сабыр, киң күңелле, игътибарлы булырга кирәк. Рәисә апа шундый олы йөрәкле кеше, - ди Зәкия Минегәрәева. "Чулпан" мәктәпкәчә тәрбия бирү учреждениесе коллективы исеменнән Зәкия апа юбилярга изге теләкләрен ирештерде.
Рәисә апа кышка шәһәргә улы Илдар һәм килене Раушания янына китә. 40 ел элек Песәйгә килен булып төшкән Арча кызы Раушания аны үз әнисе кебек якын итә. Килененең әнисенә карата җылы мөнәсәбәте сизелеп тора.
Олыгайган көннәрен кадер-хөрмәт күрсәтүче балалары, туганнары белән каршылавы белән чиксез бәхетле ул.
Язлар килү белән аның йөрәге ярсый, торган җире, өй каршында үскән таныш өянкеләре сагындыра. Минерәйсә белән бергә алар да картаялар кебек...
Гөлшат Гыйләҗева, автор фотосы.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
