Янгын сүндерүче

86 нчы янгын сүндерү службасы бүлекчәсе командиры вазифасын уңышлы башкаручы прапорщик Евгений Черемныхның биредәге эш стажы 16 ел.
ТР Менделеевск районы гражданнар оборонасы һәм гадәттән тыш хәлләр идарәсе начальнигы А.Балясов үз кул астында тырышучы хезмәткәр турында: "Сыналган егет, җаваплы һәм ышанычлы", - дип белдерде.
Евгений Геннадьевич 1996 елдан янгын сүндерү службасында. Ул Менделеевск районының Полянка авылында туып үсә. Әтисе хуҗалыкта механик, әнисе бухгалтер вазифасын башкарган. Сигезенче сыйныфны тәмамлагач, Евгений Әсән совхоз-техникумына укырга керә. Хыялы - хуҗалыкта эшләү. Яшь белгеч беренче хезмәт тәҗрибәсен "Бондюжский" совхозында зоотехник буларак туплый. Эшкә уңган, һөнәрен төптән белүче егетне соңрак "Татарстан" хуҗалыгына баш зоотехник итеп билгелиләр. Авыл тормышында кайнап үскән Евгений монда да сынатмый.
Үзгәртеп кору чорлары күпләрне яңа һөнәр үзләштерергә этәрә. Евгений Геннадьевич 86 нчы янгыннан сак бүлегенә эшкә килә. Дөрес, яңа хезмәткә төшенгәнче җиңел булмый. Тик алдына куйган максатны җиренә җиткереп үтәве, үҗәтлеге белән тиздән коллективта яхшылар рәтенә керә.
Биредә эш зур уяулык таләп итә. Кызганычка каршы, күп очракта кемнәрнеңдер саксызлыгы афәткә китерә. Кызыл әтәч кеше гомере белән дә, мал-мөлкәт белән дә санлашмый. Бүлекчә командиры Е.Черемныхның һәм ут белән көрәшүчеләрнең өлгерлеге, оешканлыгы белән күп бәла-казалар булдырылмый кала.
Евгений тормыш иптәше Марина белән егерме елдан артык бәхетле гаиләдә яши. Өлкән кызлары Олеся әнисенең һөнәр юлын сайлаган - бухгалтер, Элеонора 6 нчы сыйныф укучысы.
Е.Черемныхның фидакарьлеге "Хезмәттә уңышлары өчен" II, III дәрәҗә медальләр, ведомствоның Мактау грамоталары, Рәхмәт хатлары белән билгеләнгән. Спорт уеннарында катнашып та уңышларга ирешә.
Евгений Геннадьевич, тыйнак кеше буларак, үзе турында күп сөйләргә яратмый: "Коллективта ышанычлы, күңел биреп тырышучы команда тупланган. Бер-беребезгә ярдәм кулы сузып, бер-беребезнең җилкәсен тоеп эшлибез һәм һөнәребезнең кирәкле һәм җаваплы икәнен аңлыйбыз", - ди ул.