Менделеевские новости
  • Рус Тат
  • Яраткан укытучы, яраткан әни

    Педагогик эшчәнлек ветераны, халык мәгарифе отличнигы И.Габдуллина шушы көннәрдә олуг юбилеен билгели. Ул Бөгелмә районы Татар Кандызы авылында туган. Әтисе - колхоз рәисе, әнисе балалар тәрбияли, хуҗалык эшләрендә мәшгүль була. Сугыш башлангач әтисен армиягә алалар. Ильмира 1942 елда туган кыз. Башка күп кенә замандашлары кебек, ул да әтисен хәтта фотосүрәттә...

    Педагогик эшчәнлек ветераны, халык мәгарифе отличнигы И.Габдуллина шушы көннәрдә олуг юбилеен билгели.
    Ул Бөгелмә районы Татар Кандызы авылында туган. Әтисе - колхоз рәисе, әнисе балалар тәрбияли, хуҗалык эшләрендә мәшгүль була. Сугыш башлангач әтисен армиягә алалар. Ильмира 1942 елда туган кыз. Башка күп кенә замандашлары кебек, ул да әтисен хәтта фотосүрәттә дә күрмәгән. Фронтта һәлак булган әтисе һәм ялгызы җиде баланы аякка бастырган әнисе турында хатирәләрне гомере буе кадерләп саклый ул. Аның барлык эш - гамәлләре ирекле һәм ирексез рәвештә туганнарының өметен аклау, намус белән лаеклы яшәүгә багышлана.
    Кыз кечкенәдән белем алырга омтыла. Алабуга педагогия институтын тәмамлагач, Юраш мәктәбендә укыта башлый. кияүгә чыкканнан соң Ильмира Габдрахмановна гаиләсе белән Менделеевскига күчеп килә. 1970 елда 4 нче мәктәп коллективына килә, анда дүрт дистә ел буена татар теле һәм әдәбияты укытучысы була. Туган илгә мәхәббәт тәрбияләү, халык педагогикасына нигезләнеп балаларны төрле яклап камилләштерү И.Габдуллина эшчәнлегенең өстенлекле юнәлешләре була. Дәресләрендә һөнәри осталык һәм үзенчәлекле алымнар куллана. Ильмира Габдрахмановна тел һәм әдәбият ярдәмендә татар халкының милли традицияләрен, мәдәниятен үстерүдә үзеннән өлеш кертә.
    Юбилярның педагогик эшчәнлеге почетлы билгеләр, Мактау грамоталары һәм Рәхмәт хатлары белән билгеләп үтелә. Аның шәкертләре республика олимпиадалары, конкурсларында җиңүчеләр була. Ильмира Габдрахмановна милли мәгариф һәм тәрбия буенча директор урынбасары булып уңышлы эшли, мәктәпнең профсоюз оешмасын җитәкли, яшь белгечләргә остаз була.
    Тактлы, югары культуралы педагогны укучылар ихластан яраталар. Бүгенге көндә дә аны рәхмәт сүзләре белән искә алалар.
    Безнең язмабыз герое тормышында гаилә һәрвакыт әһәмиятле роль уйный. Ире Камил, балалары Илфат һәм Индира турында һәрдаим кайгыртучанлык күрсәтә ул. Бүгенге көндә Ильмира Габдрахмановнаның бөтен уйлары, өметләре газиз оныклары, оныкчыкларына багышлана, алар өчен ул изге күңелле, кунакчыл, яратучы дәү әни дә.

    Нравится
    Поделиться:
    Реклама
    Комментарии (0)
    Осталось символов: