Ярминкә – көз билгесе

Алтын көз көнендә узган шимбәдә "Юность" РМЙ янындагы мәйданда аграр ярминкәләр старт алды.

Авыл хуҗалыгы продуктларын беренче көзге сату - бу аграрийларның алынган уңышны үзенчәлекле тәкъдим итүе. Мини-базарда "Нигъмәтҗанов", "Мәхмүдов", "Харитонов", "Хәйриев" крестьян-фермер хуҗалыклары, "Кама" колхозы", "Алтын башак" ҖЧҖ, "Васильев" һәм "Сәгыйтов" шәхси ярдәмче хуҗалыклары үз хезмәтләренең җимешләре белән сату итте. Хуҗалыклар шәһәр халкын ашлык белән куандырды: солы, арпаның килограммы җиде сумнан, бодай - 8, арыш - 6, борчак - 10 сум.
Авыл хезмәтчәннәре ашлыктан тыш сарык ите - 280, бәрәңге - 10, кәбестә - 8 сумнан, балның килограммын 250 сумнан саттылар. Теләгән кешегә сөтнең 1,5 литрын 50 сумнан, каймак - 200, эремчекнең килосын 100 сумнан сатып алу мөмкинлеге бирелде.
Менделеевлыларны яшелчәнең мулдан булуы гаҗәпләндерде. "Звёздное" ҖЧҖ суган, кишер, чөгендерне 15-16 сумнан, кәбестә һәм бәрәңгене 10 сумнан тәкъдим итте. Сатучылар аңлатуынча, яшелчәләрне Сарман районыннан, бәрәңгене Удмуртиядән китергәннәр.
Авыл хуҗалыгы идарәсенең җитештерү-маркетинг бүлеге начальнигы Фәүзәт Мөфтиев әйтүенчә, продукция бәяләрен ТР Авыл хуҗалыгы министрлыгы билгеләгән.
- Ике көндә барлыгы тугыз тонна ашлык, 5,5 тонна яшелчә сатылды. Менделеевск халкының ихтыяҗын исәпкә алып, ярминкәләрне ешрак оештырачакбыз, көннәр салкынаюга, аграр комплекс хезмәткәрләре сыер һәм дуңгыз ите белән дә киләчәк, - диде Ф.Мөфтиев.