Яшәү мәгънәсе – гаиләдә

Халыкара гаилә көне уңаеннан газета редакциясе "Минем гаиләм" исемле фотоконкурс игълан итте.
Иң беренче булып бәйгедә катнашучылар исәбендә - төп менделеевлы, газетабызны даими укучы Созоновлар гаиләсе.
"Гаиләм - минем тормышым", - ди Эльвира Мөбәрәкҗановна, Карпов исемендәге химия заводы ветераны. 40 еллык гомуми хезмәт стажының 25 елын ул әче күкертле барий җитештерү цехында инженер технолог булып эшләүгә багышлаган. Карпов химия заводында слесарь булып утыз елдан артык эшләгән тормыш иптәше Виталий Александрович та шундый фикердә.
Эльвира һәм Виталий яшь чагында бер-бер артлы бәхет эзләп чит җиргә китәләр. Өйләнешкәннән соң берникадәр вакыт Волгоград өлкәсендә яшиләр, аннан кире кайтырга ниятлиләр. Эш сөючән, яшь гаилә балаларын үзләре үрнәгендә мөстәкыйльлеккә, үз эше өчен җаваплылык тоярлык итеп тәрбияләргә омтылалар.
- Тату яшәдек, һәрвакыт бер-беребезне ярты сүздән аңладык, - дип сөйли Э.Созонова. - Балаларыбыз да итагатьле, игелекле булдылар, мәктәптә укыганда алган Мактау грамоталары, Рәхмәт хатлары әле дә саклана.
Кызлары Марина, колледж, институт тәмамлый, хәзер саклык банкында эшли. Уллары Александр Балтыйк буе флотында хезмәт итеп кайтканнан соң, училище тәмамлый, производствода эшли, хатыны белән ике ул үстерә. Созоновларның өч оныклары бар. Өлкәне, Руслан Усманов, Маринаның улы - аларның аеруча зур горурлыгы. Бүгенге көндә армиядә, Калининградта диңгез пехотасында хезмәт итә. Кызыл мәйданда булган Җиңү парадында катнаша. Руслан һәр көнне телефоннан шалтыратып тора, аның өчен борчылмауларын үтенә.
Туган көннәр, бәйрәм һәм истәлекле даталарны гаилә мул табын янында җыелып үткәрә. Әниләр көне Созоновлар өчен кадерле бәйрәм. Яраткан хатын, ана һәм әби рольләрен берләштергән ханым - гаиләнең йөрәге. Нәкъ менә ул 39 ел буена якыннары, туганнары иминлеге сагында. Аның тырышлыгы бушка китмәгән. Балалары һәм оныклары әти-әниләренең ярдәмен, кайгыртуын тоеп яши, аларны сөендерергә һәм гаилә кыйммәтләрен саклап калырга омтылалар.