"Яшәргә дә әле, яшәргә"
Март башында 95 яшьлек юбилеен билгеләгән хезмәт ветераны Зәйтүнә апа Фәттахова шулай ди. Асия Мөхәммәтханова Камайда авылдашларының зур ихтирамын һәм хөрмәтен казанып, мактаулы гомер кичергән Зәйтүнә Фәттаховна хәзер кызы Фирдәвисә тәрбиясендә Менделеевскида яши. Зәйтүнә тормыш иптәше Низамби Муллаәхмәтович белән тугыз бала тәрбияләп үстерә, икесен югалту ачысын кичерә. 15 оныгы һәм...
Март башында 95 яшьлек юбилеен билгеләгән хезмәт ветераны Зәйтүнә апа Фәттахова шулай ди.
Асия Мөхәммәтханова
Камайда авылдашларының зур ихтирамын һәм хөрмәтен казанып, мактаулы гомер кичергән Зәйтүнә Фәттаховна хәзер кызы Фирдәвисә тәрбиясендә Менделеевскида яши.
Зәйтүнә тормыш иптәше Низамби Муллаәхмәтович белән тугыз бала тәрбияләп үстерә, икесен югалту ачысын кичерә. 15 оныгы һәм 21 оныкчыгы - нәселләрен дәвам итүчеләр.
- Әниебез "Батыр кул" колхозында төрле эшләр башкарды. Карлы-яңгырлы көннәрдә урман кисү вакытлары да аның хәтерендә тирән уелган. Тырыш тракторчы әниебез бригадир булган, - ди Яр Чаллыда яшәүче кызы Гөлфәния.
Зәйтүнә апаның улы Миндильнең балачагы барлык нечкәлекләре белән исендә:
- Өйдә зур өстәл, озын сәке. Сигез балага дәрес әзерләргә урын җитми иде. Әни һәр көнне мич тутырып ипи пешерде. Без дә, кул арасына кереп, ярдәм итәргә тырыштык, - дип искә ала ул.
- Бөек Ватан сугышы башланган көннән фронтка алынган әти җиңү белән яу кырыннан кайта, 62 яшендә гүр иясе була. Әти-әниебез безне хезмәт сөючән һәм тәртипле итеп үстерде. Без дә үз балаларыбызны һәм оныкларыбызны алар үрнәгендә тәрбиялибез, - дип сүзгә кушыла Зәйтүнә апаның кызы Фирдәвисә.
Зәйтүнә апаның балалары, оныклары, оныкчыклары - һәрберсе гаиләләре белән җыелса, аларның саны алтмыштан арта. Түгәрәк өстәл янында урыны өй түрендә булган, чәчләренә еллар бизәге төшкән, барлык изге гамәлләре дә энҗе булып гомер юлларына сибелгән ананың күзләрендә нур балкый.
- Аллага шөкер, балаларым тәртипле, йөзебезгә кызыллык китермәделәр. Гомер көзләрендә аларның кадер-хөрмәтен тоеп яшим, - ди ветеран.
Мул табын янында Гөлфәния апа җыр сузды:
Гомер берәү, икәү түгел гомер
Яшеннәрдәй кирәк яшьнәргә.
Шул мизгелнең кадерләрен белеп
Яшәргә дә әле яшәргә.
Эмма Панфилова фотосы
Телефон АО «ТАТМЕДИА»: (843) 222 09 84