Язгы ташуга әзерлек турында

Республика гадәттән тыш хәлләрне кисәтү һәм бетерү һәм янгын куркынычсызлыгын тәэмин итү буенча комиссиянең видеоконференция режимында чираттан тыш утырышы узды.
Чара ташу суларын тоткарлыксыз үткәрүне оештыруга багышланды. Гадәттән тыш хәлләр министры урынбасары Николай Суржко республикада язгы ташу чорына планлаштырылган чараларга тукталды. Ведомство җитәкчеләре халык куркынычсызлыгын тәэмин итү турында мәгълүмат бирде.
Республиканың гидрометеорология һәм әйләнә-тирә мохитне күзәтү идарәсе начальнигы Сергей Захаров сүзләренчә, хәл беренче карашка күренгәнчә үк куркыныч түгел. Дөрес, көз аеруча җылы һәм яңгырлы булу сәбәпле, җир кышка мул су запасы белән керде. Һәм мартта да юеш кар, яңгыр көтелә. Елгаларда боз апрельнең беренче декадасында кузгалыр дип фараз ителә. Әмма бөтенесе һава торышына бәйле булачак. Шунлыктан, ташуга җитди әзерлек сорала.
Күтәргән теманы дәвам итеп, районның гадәттән тыш хәлләр буенча комиссия рәисе урынбасары Роберт Гаффаров "Ташу" планы нигезендә мөмкин булган гадәттән тыш хәлләргә каршы тору чаралары белән таныштырды.
Менделеевскиның янгыннан сак гарнизоны начальнигы Александр Балясов районның су объектлары торышы, аларның язгы ташуны авариясез үткәрүгә әзерлеге турында сөйләде һәм табигать сюрпризларын ныклы әзерлек белән каршыларга өндәде.
Шәһәр башкарма комитеты җитәкчесе Рафаэль Сабитов һәм "Татавтодор" Алабуга идарәсе директоры Рафаэль Погосян язгы ташкын чорына юлларны, ясалма корылмаларны, йортларны әзерлектә тоту чаралары белән таныштырдылар.
"Менделеевск икмәк заводы" ҖЧҖ директоры Ринат Бикташев һәм "Л.Я.Карпов исемендәге химия заводы" ААҖ гражданнар оборонасы штабы начальнигы Андрей Закусилов билгеләвенчә, предприятиеләрдә ташуга әзерлек күптән башланды.
Гадәттән тыш хәлләрне кисәтү һәм бетерү буенча комиссия утырышы карар кабул итү белән төгәлләнде.

Фәймә Наилова