Юбиляр вальс бии

Бүгенге язмабыз шушы көннәрдә 90 яшьлек юбилеен билгеләгән Менделеевск шәһәрендә яшәүче завод ветераны Татьяна Васильевна Воробьёва турында.
90 яшьтә, сәхнәдә булмаса да, үз өендә вальс биеп була дип кем уйлар! Татьяна Васильевна - моның ачык мисалы. Ул кызы Галина белән бүлмә буйлап вальста бөтерелә.
- Мин элек мәдәният йортындагы бер генә кичәне дә калдырмадым, - дип сөйли Татьяна Васильевна. - Без "Коммуна"дан ерак булмаган баракларда яшәдек. Сугыш башланганчы, кинога еш йөрдек, бик күңелле чор иде. Аннан куркыныч, ачлык еллары килде, - ди әңгәмәдәшем тавышында калтырау белән.
- Әнием бу турыда сөйләргә яратмый, хатирәләрен авыр кичерә, - дип кисәтә безне Галина Николаевна.
...Фабрика-завод һөнәре бирү мәктәбен тәмамлаган үсмер кызны хлорлы барий цехына аппаратчы итеп билгелиләр. Аннан реактив тозлар җитештерү цехына күчерелә.
- Яраткан бәйрәмегез нинди? - дип кызыксынабыз.
- Химиклар бәйрәме һәм, билгеле, Җиңү көне! Элек парадка да чыга идем, хәзер көймәм комга терәлде, - дип шаярта юбиляр һәм безгә юбилей медальләрен күрсәтә.
- Әниемнең химия заводындагы эш стажы 30 елга якын, - ди Галина Николаевна. - Бондюгта яшәгәндә бакчада казынырга ярата иде. Соңгы биш елда гына сәламәтлеге какшады. Хәзер телевизор карый, сәясәт белән кызыксына, Украина өчен борчыла, чөнки сеңлесе шунда яши.
- Мин бәхетле кеше, - дип саный Татьяна Васильевна. - Ирем Николай Семёнович фани дөньядан китсә дә, тормыш дәвам итә. Өч балам, җиде оныгым, дүрт оныкчыгым бар, кичә барысы да янымда булдылар. Район хакимиятеннән һәм Социаль яклау идарәсеннән котларга килделәр, безне, өлкән яшьтәгеләрне, онытмаулары күңелгә рәхәтлек бирә. Сезгә дә мине хөрмәтләп килүегез өчен рәхмәт.
Вәсилә Мортазина
Рәис Сәхапов фотосы