Зөбәрҗәт туй вальсы яңгырашында

Анна Ивановна һәм Аркадий Александрович Никитиннарның бергә яшәүләренә 55 ел тулу уңаеннан зөбәрҗәт туй тантанасы оештырылды.

Чараны алып баручы гражданлык хәле актларын теркәү бүлеге начальнигы Фаина Козырева зөбәрҗәт юбилярларга матур теләкләр белән чәчәк букеты тапшырды. Никитиннар ул көнне "Бердәм Россия" партиясенең җирле бүлекчәсе башкарма комитеты җитәкчесе Клавдия Смирновадан, башкарма комитет җитәкчесе урынбасары Павел Мироновтан тәбрикләү сүзләре һәм бүләкләр кабул иттеләр.

Рамил Дәүләтшин башкаруында яңгыраган җырлар тантана геройларын гүя яшьлекләренә алып кайтты, күзләрен яшьләндерде.
Кызлары Вера өч балалары, ике оныклары исеменнән мондый теләкләр җиткерде:
- Аллаһы Тәгаләнең иң мәрхәмәтле, эшчән, тормышта үрнәк булырдай ата-ана бирүенә шатланып туймыйбыз, гаилә учагыгыз озак сүнмәсен.
Кызлары аларны вальс әйләнергә чакырды.

Никитиннар чыгышлары белән Сәйтәктән.
- Безне туганыбыз таныштырды. Мин ул чорда Чаллыда сөт заводында эшли идем. Берничә ай очрашып йөргәч, Аркадий кияүгә чакырды, - дип сөйли Анна Ивановна.
Карпов исемендәге химия заводында өлкән аппаратчы булып хезмәт куйган Аркадий Александрович тормыш иптәшен дә шунда күчәргә күндерә.
- Анна предприятиедә сак бүлегендә эшләде, аннан минем янга "Прикамнефть" идарәсенә килде. Үземнән ерак җибәрмәдем, күз алдында гына йөрттем. Икебезгә 70 елга якын хезмәт стажы туплап, шуннан пенсиягә чыктык. Үз йортыбыз белән посёлокта яшәдек. Мал-туар асрадык, бакча тоттык. Әле дә ишегалдын буш итмик дип, тавыклар үрчетәбез, үзебез үстергән җиләк-җимеш, яшелчә ашыйбыз, - ди гаилә башлыгы.
Киләсе елда Никитиннар бер-бер артлы 80 яшьлек юбилейларын билгеләячәкләр. Алар гаилә тантанасында балаларын вальс әйләнеп сөендерергә исәплиләр.