Зөлфия әби Әбделхакова: “Йөз яшьлек юбилеема да килегез”

Озын гомерле юбилярларны котлау, аларга Россия, Татарстан Президентларыннан исемле открыткалар, шәһәр җитәкчелегеннән котлау адресы, истәлекле бүләк тапшыру традициягә әверелде.
Шушы көннәрдә Тын Тауда яшәүче Зөлфия Әбделхаковна Әбделхакова авылча зәвык белән бизәлгән йортында күпсанлы кунаклар кабул итте. Туксан яше тулган тыл ветеранын район башлыгы урынбасары Рөстәм Хәбибуллин котлады, чәчәк һәм бүләкләр тапшырды. Сугыш һәм хезмәт ветераннары советы рәисе Любовь Сорокина, Социаль яклау идарәсе начальнигы Әлфия Салаватуллина, тәбрикләүләргә кушылып, изге теләкләр җиткерделәр.
Унынчы дистәсен ваклаган көләч йөзле, көр күңелле, шук сүзле Зөлфия Әбделхаковна кунакларны алдагы юбилей очрашуына да чакырды.
- Безнең чор балалары иркә тормышта үсмәде. Әти-әнием - Ульян өлкәсе мишәрләре, Бондюгка 1932 елда килеп урнашалар. Матур табигатьле Кама буенда яшәдек. Әти, балта остасы буларак, гаиләне хезмәт куеп тәэмин итте, - дип балачагын искә төшерә юбиляр.
1942 елда фронтка киткән Әбделхак абый биш баласы, хатыны Мәсрүрә белән мәңгегә саубуллашуын белми әле. Бер ел сирәк кенә булса да солдат хатлары килеп тора. Соңгысы - "похоронка" дигәне гаилә башлыгының Курск дугасында һәлак булуын белдерә.
- Ул елларда ил халкының авыр язмышын без дә тарттык. Шөкер, сынмадык, ныгыдык, чыныктык кына. Ризыгыбыз черек бәрәңге, урман байлыгы булды. Аптырыйм: ачлы-туклы яшәсәк тә, авырмадык, - дип өсти Зөлфия әби.
Әңгәмәгә кушылган сеңлесе Сания апа:
- Гаиләдә иң өлкән Зөлфия тормыш авырлыгын күп татыды, тырышып 7 нче сыйныфны укып чыкты. Ул безнең "ут борчасы" - үзе дә тиктормас, безгә дә тынгылык бирми иде. Әле дә һәркемгә "боерыклар" чәчә, ялкау-җебекләрне сөйми, - дип сөйли.
Зөлфия Әбделхаковна 18 яшендә Александрга кияүгә чыга. Һөнәре буенча тракторчы нефть чыгару өлкәсендә хезмәт куя. Юбиляр 30 елдан артык елга портында, тегермәндә, икмәк пешерү заводында эшли, коммуналь хуҗалык предприятиесеннән лаеклы ялга чыга.
Өлкән кызлары Нурия Алабугада яши, лаеклы ялда. Әбделхаковлар мәңге онытылмаслык кайгы кичерәләр - кече кызлары Люция, сигез айлык сабыен ятим калдырып, иртә дөнья куя. Хәзер оныгы Альберт тормыш иптәше Фаина белән әбисен кадерләп тәрбияли.
- Картлыгым бәхетле булганга сөенеп туя алмыйм. Бала баккандай күңелемне күрәләр. Сеңлем Сания дә шушы урамда яши, ул да хәлемне белеп тора, - дип рәхмәтләрен җиткерә ветеран.
Альберт белән Фаина тормыш сөючән, көр күңелле, хәзер дә кул кушырып утырырга яратмаган әбиләре турында сөйлиләр:
- Уңайлы фатирында берничә көн генә торды. Җирдән ераклашсам, тыным кысыла, мичемне ягып, чишмә суы эчеп, Кама буен күзәтеп яшисем килә. Тир түгеп төзегән йортымны буш итмим, дип, әбиебез кире Тын Тауга китте.
Зөлфия Әбделхаковна үзенә ихтирам, игътибар күрсәткән һәркемгә рәхмәтләрен укып, киләчәктә дә очрашуга ышаныч белдереп, безнең белән саубуллашты.

Фәймә Вахриева