Зәйнәп ханымның бәхет агачы

Безнең язмабыз герое Зәйнәп Гыйззәтуллина - иҗади шәхес. Аның кулында йөзләгән кечкенә сәйләннәр искиткеч агачларга, төрле төстәге җепләр бәйләнгән көнбагыш, шәл, пледларга әверелә. Һәр эшләнмәнең үз тарихы.
- Тормыш юнәлешләрен әти-әнием бирде, - дип сөйли ул. - Әтием Хәбибулла һәвәскәр бакчачы иде. Бакчабыз һәрвакыт мул уңышы белән дан тотты. Әти метеорологик күзәтүләр көндәлеге алып барды, халык сынамышларын исәпкә алды. Мәсәлән, ул болай дип әйтә: "Чыршы күркәсе күренде, кыяр утыртырга вакыт". Сынамыш үзен аклый, кыярны туйганчы ашыйбыз, туганнарга, дусларга өләшәбез, тозлыйбыз, хәтта малга бирәбез. Ә әнием Тәгъзимә - бәйләү остасы. Мине гади әйберләргә - энә һәм элмәк белән дөрес эшләргә, катлаулы булмаган бизәкләргә өйрәтте.
Зәйнәп мәктәпне тәмамлаганнан соң пешекче һөнәрен үзләштерә. Яшьлеге һәм романтика аны төзелүче Менделеевскига алып килә. Биредә мәхәббәтен очрата, кияүгә чыга, уллары туа.
- Ул тормыш сөючән, мөлаем иде, киләчәккә планнар төзеде, - дип күз яшьләре белән дәвам итә әңгәмәдәшем. - Ләкин язмыш башкача хәл итте: мәкерле авыру улымны тартып алды... Ничек кичердемме? Больницаларда: кан басымы уйнаулар, укол, системалар, хирургик операцияләр, депрессия...
Әмма Зәйнәп ханым алга таба яшәргә үзендә көч таба. Менә шул вакытта бәйләү дә, бакчачылык та ярдәм итә.
- Кул эшләре турында журналлар алдырдым, гади әйберләрдән башладым. Осталыгымны даими камилләштердем. Башта үзем өчен, туганнарыма, дусларыма бүләккә бәйләдем, соңрак сатуга да.
Аның эшләнмәләренә карап гаҗәпләнәсең: һәр әйбер кабатланмас, төсләргә, бизәкләргә бай. Караватта челтәрле бәйләмле плед, урындыкларда япма-көнбагышлар. Үзенчәлекле орнаментлы өй тапочкалары туганнарына 8 Март бүләгенә әзерләнгән.
Хуҗабикә безне маринадланган җирән гөмбә, болгар борычыннан салат һәм кабарып пешкән сумса белән сыйлый.
- Пешеренергә яратам, - ди ул. - Минем "фирмалы" ризыкларым - үзенчәлекле рецепт буенча солянка, каз итеннән өчпочмак, үзбәк сумсасы. Дача участогыбыз бар, әтиемнең көндәлеге буенча утыртам, хәзер аны үзем алып барам. Компот, кайнатма, салатлар ясыйм. Ирем Юра балыкчы.
Зәйнәп Гыйззәтуллинаның зәвыклы фатирында бүлмә гөлләренә күп урын бирелгән. Үсемлекләргә дизайнерча якын килү сизелә. Әңгәмәдә ачыкланганча, алар дәвалау максатында да үстерелә икән. Мәсәлән, монстера баш авыртуын бетерә, лимон яфракларының исе рух күтәренкелеге бирә, югары кан басымын төшерә.
Ә күптән түгел оста тагын бер шөгыль - сәйлән үрүне үзләштергән. Һәм ул гаҗәеп агачлар, куак, чәчәкләр ясый.
- Ярдәмгә компьютер килде, - дип бүлешә Зәйнәп Хәбибулловна. - Нечкәлекләрен үзем өйрәндем, тарафдарлар таптым, социаль челтәрдә аралашабыз, тәҗрибә уртаклашабыз.
Барбарис, лаванда, сакура, сирень, инь-янь, бонсай, алмагач... Һәр эше соклануга лаек, зәвыклы, кабатланмас.
- Ә бәхет агачы ясап караганыгыз юкмы? - дип сорыйм.
- Ул миндә бар инде, - ди Зәйнәп ханым. - Мәкальдә әйтелгәнчә: "Бер агач үзендә күп ботаклар тота". Бәхет агачының ябалдашы астында яраткан ирем белән яшим, туганнарым, дусларым белән аралашам, кул эшләре белән шөгыльләнәм, һәр көнгә шатланам.

Рәхилә Мирзаянова

Автор фотолары