Район яшьтәше вәкиле

- Гөлназ май аенда туды, ул көнне җепшек кар яуды. Әмма ул безнең шатлыгыбызга комачауламады, - диләр Фәния Рафаиловна һәм Фоат Фәйзрахманович. - Без аны һәм өлкән кызыбыз Гүзәлне бик яратып, назлап үстердек. Гөлназ яхшы укыды, аралашучан булды. Балалар иҗат үзәгенә педагог Әлфия Талыйпова җитәкләгән театр түгәрәгенә йөрде.

Аннан Алабуга дәүләт педагогия университетының тарих-филология факультетын уңышлы тәмамлады. Күп яшьтәшләре кебек, бәхет эзләп читкә китә, ләкин Казанда бер ел эшләгәннән соң, туган йортына кайтырга карар кыла, чөнки туган җирендә күбрәк файда китерәчәген аңлый. Мәгариф идарәсенә белгеч булып эшкә урнаша. Биредә булачак ире Вадимны очрата. Хәзер яшь гаилә уллары Василий һәм Богданны тәрбияли.

Балалар иҗат үзәгендә эшләү аның өчен яшәү рәвеше, илһам чыганагына әйләнә. Кыска вакыт эчендә "Триумф" театр коллективы шәһәрдә популярлык казана, балалар анда яратып йөри. Аның шәкертләре - региональ бәйгеләрдә генә түгел, халыкара конкурсларда да җиңүчеләр. Чыгарылыш укучысы Аделина Сперанская быел Санкт-Петербургтагы чит телләр һәм мәдәни хезмәттәшлек иснтитутының театр факультетына Россиянең атказанган режиссёры һәм актеры Сергей Мурзинга укырга кергән.

Гөлназ туганнары белән горурлана. Бабасы Фәйзрахман Шәмсетдинович хатыны Рәйсә Шакировна белән озын һәм бәхетле гомер кичерәләр, өч ул үстерәләр, аларда туган җиргә мәхәббәт тәрбиялиләр. Ф.Юнысов 1942 елда үзе теләп фронтка китә, Җиңү көненә кадәр хезмәт итә, яралана. Демобилизациядән соң, "Коммуна" театрында киномеханик, Карпов исемендәге химзаводның нефть-селте хуҗалыгында мастер, контактлар цехында аппаратчы булып эшли. Җәмәгать эшендә актив катнаша, ветераннар хорына йөри.

- Бабам, рус халык җырларын оста итеп башкара иде, - дип сөйли Гөлназ. - Әбием башлангыч сыйныф укытучысы булып эшләде. Инде мәрхүм булсалар да, без аларны истән чыгармыйбыз. Әтиемнең дә тормышы вакыйгаларга бай булды.

Фоат Фәйзрахманович мәктәп тәмамлаганнан соң, Ленинград нефтьчеләр техникумында укый. Юллама белән Сахалинга китә, анда нефть эзләү экспедициясендә бораулау жиһазларын ремонтлау буенча слесарь булып эшли. Армиядән соң Корсаков шәһәрендә "Яңа Ладога" йөзү базасы судносында балык эшкәртүче матрос булып урнаша. Тын Океан, Охота диңгезен иңгә-буйга йөзә.

Әтисе чакыруы буенча өенә кайта. "Улым, туган җиреңне, заводны ташлама", - дип үтенде, - дип искә ала Фоат Юнысов.

Озак еллар химия заводында эшли, мастер, газ службасы начальнигы, аннан Менделеевск җылылык челтәрендә инспекция начальнигы була.

- Билгеле инде әнием минем өчен һәрвакыт балкыган кояш булды, аның белән җылы һәм якты, - дип өсти язмабыз герое.

Юнысовлар үз үрнәкләрендә эштән курыкмаган һәр кеше уңышка ирешергә мөмкин булуын раслыйлар. Менделеевск өчен шундыйлар таяныч булып тора да.