Менделеевск яңалыклары
  • Рус Тат
  • Тылсымлы моң дөньясында

    Күпкырлы талант иясе, тәҗрибәле педагог Эльмира Сабирҗанова шушы көннәрдә 50 яшьлек юбилеен һәм балалар сәнгать мәктәбендә хезмәт эшчәнлегенең 20 еллыгын билгеләде. - Минем бар яшәешем музыка белән бәйләнгән, аннан башка тормышымны күз алдына да китерә алмыйм. Җиде ел шәһәрнең сәнгать мәктәбендә, аннан Смоленскида музыка-педагогика училищесында, соңрак Казан педагогия институтының музыка...

    Күпкырлы талант иясе, тәҗрибәле педагог Эльмира Сабирҗанова шушы көннәрдә 50 яшьлек юбилеен һәм балалар сәнгать мәктәбендә хезмәт эшчәнлегенең 20 еллыгын билгеләде.

    - Минем бар яшәешем музыка белән бәйләнгән, аннан башка тормышымны күз алдына да китерә алмыйм. Җиде ел шәһәрнең сәнгать мәктәбендә, аннан Смоленскида музыка-педагогика училищесында, соңрак Казан педагогия институтының музыка факультетында сәнгати белем үзләштердем, - дип сөйли Эльмира Дамировна. - Беренче һөнәри эшчәнлегем шәһәрнең 1 һәм 13 нче балалар бакчаларында музыка җитәкчесе буларак башланды. Сигез ел дәвамында нәниләрне җыр-биюгә, музыканы аңлый белергә, сәхнәдә чыгыш ясау серләренә өйрәттем.
    Юбилярның сәнгать мәктәбендә ике дистә елы күз ачып йомганчы узган. Көн артыннан көн, атналар, еллар... Дәресләр, репетицияләр, концертлар, укучыларының иҗат уңышлары.
    - Илһам - күңел халәтенең канатланган чагы. Тормышымда яшәргә, эшләргә көч һәм иҗади дәрт, күтәренкелек бирүчеләр - музыка, табигать, картиналар, гаиләм, сөекле балаларым: кызым һәм улым, әлбәттә инде, яраткан укучыларым, - дип дәвам итә әңгәмәдәшем.
    "Минем укучыларым, минем кызларым!" Укытучы әйткән шушы сүзләр тирән мәгънәгә ия. Якташыбыз шәкертләре турында сәгатьләр буена сөйли ала, аларны үз балаларыдай якын күрә, җырчы булырга телиме ул, музыкантмы, - һәркайсының талантын, сәләтен камилләштерүдә көчен дә, вакытын да кызганмый. Аның классында укучылар рояльдә моңлы көйләр уйнаганда тавыш нечкәлекләрен күңел аша тоемларга өйрәнәләр. Фортепиано бүлеге шәкертләре ялгыз яисә ансамбль белән чыгыш ясарга гына түгел, башка уен коралында һәм җырлаучыга кушылып рояльдә уйнарга да сәләтлеләр.
    Эльмира Дамировна тормыш иптәше Камил Закирович - доцент, Яр Чаллының КФУ филиалында белем бирүче - белән ике бала үстерә, Лилия һәм Искәндәр - 1 нче мәктәп шәкертләре, Лилия берүк вакытта БСМнең сәнгать бүлегендә белем ала, дүрт ел музыка классында укый.
    - Музыка - яраткан шөгылем. Сәнгатькә мәхәббәт әнием Флора Гарифовнадан күчкән дип саныйм. Ул матур җырлый иде, кызганыч, бик иртә гүр иясе булды, - ди Эльмира ханым. - Минем теләгем: укучыларым моңны, уен коралларын яратсыннар.
    Күркәм юбилее уңаеннан балалар сәнгать мәктәбендә Эльмира Сабирҗанова укучыларының "Илһам телим" отчет концерты булды. Анда район мәдәният идарәсе начальнигы Лилия Галиева, сәнгать мәктәбе директоры Наилә Ювакаева, хезмәттәшләре, укучыларның ата-аналары, гаиләсе, туганнары, дуслары һәм күпсанлы тамашачыларның җылы тәбрикләү сүзләре укучыларның музыкаль чыгышлары белән үрелеп барды. Концертны Эльмира Дамировна һәм аның хезмәттәшләре белән башкарган йөрәк түренә үтеп керерлек романслар, аһәңле көйләр бизәде. Тирән эчтәлекле җырлардан тамашачының күзләре яшьләнде.
    - Тылсымлы музыка дөньясында иҗат итәргә, сәнгать өлкәсендә яңадан-яңа уңышларга ирешергә язсын, - дип белдерделәр хезмәттәшләре.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: