Яшь буынга остаз

"Кама таңнары" приюты тәрбиячесе Марина Куликова 2015 елдагы эш нәтиҗәләре буенча "Һөнәре буенча иң яхшы" булып танылды.

Марина Владимировна биредә 15 ел хезмәт куя.

- Балалар белән эшләү бик катлаулы, үзенчәлекле, мавыктыргыч хезмәт. Бу эш һәрвакыт белемне үстерергә, камилләштерергә, туктаусыз эзләнергә мәҗбүр итә. Шунсыз мөмкин түгел. Белемне туктаусыз тулыландырып тормасаң яшь буынга тәрбия бирүдә остаз булу, аларны үз артыңнан ияртү катлаулы булыр иде, - ди Марина Куликова.

Узган елда Марина ханым һөнәри осталык буенча оештырылган республика бәйгесендә "Тормышта авыр хәлдә калган балалар белән эшләү" номинациясендә "Социаль хезмәт күрсәтү учреждениесенең иң яхшы хезмәткәре" буларак 3 нче урынга лаек булды һәм диплом белән бүләкләнде.

- Җиңүнең 70 еллыгына багышланган республика бәйгесендә приютта тәрбияләнүчеләр иҗаты иң яхшылардан дип табылды. Аларның эше "Җирдә тынычлык хакына" исемле тарихи видеоҗыентыкка керде. Балалар "Бөек Ватан сугышында минем гаиләм", "Кояшлы куянкай-2015", "Балалар күзлегеннән Динамо" һәм башка темаларга багышланган күпсанлы бәйгеләрдә катнаштылар. Биредә тәрбияләнүчеләрнең энергия ресурсларын саклау турындагы иҗади эшләре "Татэнергосбыт-2016" республика календарендә урнаштырылды, - дип дәвам итә тәҗрибәле белгеч. - "Сүз остаханәсе" түгәрәгендә мәктәпкәчә яшьтәгеләр сөйләм телен үстерү буенча теләп шөгыльләнә: шигырьләр ятлыйлар, тарих турында хикәяләр төзиләр, балалар тормышыннан кызыклы вакыйгалар җыялар. Иң яхшы дип табылганнары агымдагы елда приютның 15 еллыгына багышланган җынтыгыбызда урын алачак.

Марина Владимировна күпләргә каләм тибрәтүче буларак яхшы таныш, шигырьләре район газетасында еш яктыртыла. Ул С.Гассар исемендәге Мәдәният сараенда оештырылган Радик Ахунҗанов җитәкчелегендәге "Лира" әдәби берләшмәсе активисты.

- 2015 нче әдәбият елында мин район халык иҗаты фестивалендә катнаштым. Җирле шагыйрьләрнең яңа җыентыгы нәшер ителүен түземсезлек белән көтәм. 2016 елга яңа иҗади планнарны гамәлгә ашыру максатыннан балалар янында тырышып эшләргә исәбем, - ди Марина Куликова.