Ишегалды мәйданчыгына икенче тормыш

Чираттагы универсаль спорт мәйданчыгын ачу мәдәни-спорт атнасының йомгаклау аккорды булды.
Бурмистров урамының 4 һәм 6 нчы йортларындагы яшь яшәүчеләр бу вакыйганы яздан бирле көттеләр. Ә "Бердәм Россия" партиясенең җирле бүлекчәсе эгидасында махсус япмалы волейбол-баскетбол кырын төзү һәм мәйданчыкны яңарту башлангач, балалар һәм зурларның шатлыгының иге-чиге булмады.
Тантананы ачып, алып баручы Елена Чеботарёва сүзне кунакларга бирде.
Җыелганнарны күңелле вакыйга белән котлап, район башлыгы Игорь Привалов болай диде:
- Быел без мондый өченче мәйданчыкны куллануга тапшырабыз. Балалар белән эшләүнең мөһим юнәлеше булып аларны сәламәт яшәү рәвешенә җәлеп итү, спорт уеннарын үстерү тора. Хәзер әлеге ишегалдында моның өчен барлык шартлар да тудырылган.
Подряд оешмасы - "Созидание" ҖЧҖ директоры Рамил Җиһаншинга Рәхмәт хаты тапшырып, Игорь Анатольевич сыйфатлы эш һәм объектны вакытында тапшырулары өчен рәхмәт белдерде.
ТР төзелеш, архитектура һәм ТКХ министры урынбасары Юрий Аляшев балаларга спорт уңышлары һәм яңа җиңүләр теләде. Рамил Җиһаншин яшь менделеевлыларга туплар бүләк итте. "Батыр" спорт мәктәбе шәкертләре исеменнән Ләйлә Матвеева балалар хыялын чынга ашыручыларга рәхмәт белдерде.
Бурмистров урамының 6 нчы йортында яшәүче Л.Карпов ис. химзавод ветераны Ольга Леонова болай диде:
- Балаларга йөгерер, шөгыльләнер урын бар. Атынгычлар, швед стенасы, турник белән яшел зона сакланды. Өлкәннәр өчен эскәмияләр дә куйсалар, яхшы булыр иде. Моны элеккеге бала тудыру йорты бинасында ял зонасында эшләргә була. Ире Ринат белән йорт комитеты рәисе Светлана Сираева да зур өлеш кертте, аларга рәхмәт.
Дамир Гомәров һәм Ильмир Муллаәхмәтов ишегалдындагы үзгәрешләргә бик шат һәм волейбол-баскетбол мәйданчыгында уйнап карауны түземсезләнеп көтәләр. Ишегалды командасы уенчыларының - спортны яратучы Денис Бакакин, Валентин Досманов һәм капитан Сөнгат Тәхаветдиновның (рәсемдә) да теләкләре шул ук.

Роза Шәрәфиева

Рәхилә Мирзаянова фотолары