Көчле рухлылар спартакиадасы
Шимбә көнне "Химик" спорт комплексында Инвалидлар ункөнлегенә багышланган физик мөмкинлекләре чикле кешеләр өчен спартакиада булды. Катнашучылар парадын район җитәкчесе Валерий Чершинцев исеменнән башкарма комитет җитәкчесенең социаль мәсьәләләр буенча урынбасары Константин Макаров сәламләде. - Бүген спорт залында көн саен кыенлыклар белән очрашучы кешеләр җыелды. Ләкин сез тырышып һәм үҗәтләнеп аларны җиңәсез....
Шимбә көнне "Химик" спорт комплексында Инвалидлар ункөнлегенә багышланган физик мөмкинлекләре чикле кешеләр өчен спартакиада булды.
Катнашучылар парадын район җитәкчесе Валерий Чершинцев исеменнән башкарма комитет җитәкчесенең социаль мәсьәләләр буенча урынбасары Константин Макаров сәламләде.
- Бүген спорт залында көн саен кыенлыклар белән очрашучы кешеләр җыелды. Ләкин сез тырышып һәм үҗәтләнеп аларны җиңәсез. Сочидагы кышкы Паралимпия уеннарында спортчылар батырлыкның һәм ныклыкның ачык үрнәген күрсәттеләр. Чемпионнар булып тумыйлар, алар шөгыльләрдә, район һәм республика ярышларында катнашып үсәләр. Районда "Кулай мохит" программасы уңышлы тормышка ашырыла. Һәм бүген катнашучыларга рух көрлеге һәм җиңел булмаган спорт биеклекләрен яулауларын телим. Көчлеләр җиңүгә ирешсен, - диде ул.
Спартакиадага тулы составта диярлек коррекция мәктәбе укучылары килгән.
- Безнең балалар физкультура һәм спорт белән шөгыльләнергә яраталар. Шушы көннәрдә алар өстәл теннисы буенча зона ярышларында актив катнаштылар, - дип бүлеште директорның тәрбия эшләре буенча урынбасары Наталья Архипова.
Ярышучыларның күпчелеге стенадагы мишень янына тезелде. Жирәбә буенча, дротикларны беренче булып 6 нчы сыйныф укучысы Аделина Стрелкова ата башлады.
- Мин 64 балл җыйдым. Әлегә җиңүчеләр исемлегенә эләгәчәгемне белмим, ләкин бу минем өчен мөһим түгел. Ярышларның бу төре ошый, һәм аларда рәхәтләнеп катнашам, - ди Аделина.
Нәтиҗәдә төгәл атучы дип Стас Чебаков танылды.
Ангелина Младенцева бер генә чараны да калдырырга тырышмый.
- Кызым өч яшеннән шөгыльләргә йөри, өстәл теннисын ярата. Элек Юбилейная урамының 9 нчы йорты подвалында урнашкан БИҮ каршындагы спорт залында шөгыльләнә идек, хәзер - 4 нче мәктәптәге "Патриот" үзәгендә, - ди әнисе Нина Ивановна.
Тырышып гер күтәргән Андрей Мардашовны күзәтәбез. Көчләрен күрсәтергә теләүчеләр күп.
- Афәрин, әйдә тагын бер тапкыр! - дип кабатлый хуплау төркеме.
Спортның әлеге төре буенча Рөстәм Миңнегәрәев лидер булды.
Армрестлинг иң күп җанатарларны җыйды. Ирләр һәм үсмерләр арасында Николай Прохоровка һәм Сергей Мардашовка җиңү җиңел бирелде. Хатын-кызлар арасында янәдән Мария Урсеговага тиңнәр булмады.
Теннис өстәле янында да җанлылык. Беренчелек пальмасы өчен көрәшкә ветераннар керешә.
- Спартакиаданы оештыручыларга рәхмәт. Безнең өчен хәрәкәт - ул тормыш, - дип бүлеште беренче урынны алган Нина Романова.
Җанатарлар шахматчыларның азартлы уеннарын кызыксынып күзәттеләр. Николай Прохоров яхшы уен техникасы күрсәтте.
Бу көнне чараны оештыручылар - Социаль яклау идарәсе (Әлфия Салаватуллина) һәм яшьләр эшләре, спорт һәм туризм бүлеге (Александр Макаров) спорт комплексы фойесында чәй өстәлләре әзерләделәр. "Патриот" һәм "Форпост" тренерлары һәм укытучылары Андрей Шарашкин, Рөстәм Миңнегәрәев, Эдуард Суфиев һәм Юрий Дюжакин составындагы судьялар коллегиясе турнирда катнашучылар тарафыннан дәгъваларсыз эшләде.
Җиңүчеләргә грамоталар, дипломнар, район җитәкчесеннән премия тапшырылды.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
