Менделеевск көрәшчеләре – почёт пьедесталында

Батыр" балалар-үсмерләр спорт мәктәбенең җыелма командасы ирекле көрәш буенча Советлар Союзы Герое Михаил Просвирнин истәлегенә багышланган Ачык республика турнирында катнашты.

Казан, Түбән Кама, Мамадыш, Яр Чаллы, Алексеевск, Тукай һәм башка районнардан җыелган өч йөздән артык спортчы җиңү хокукы өчен көч сынашты. Ирекле көрәш буенча секциядә сентябрь аеннан гына шөгыльләнүче Аяз Сәлахов өчен бу беренче җитди имтихан булды. Шуңа да карамастан, яшь спортчы үз авырлык категориясендә өченче урын яулады. Павел Вәлиуллин шулай ук өченче урында. Беренче урын алган Тимур Зубрин җиңүе белән куандырды. Көрәшче Дагыстан Республикасының Хасавьюрте шәһәрендә уку-күнекмәләр җыенында җитди әзерлек үтте.

Үсмерләрнең уңышын тулы хокук белән тренер Александр Григорьев уртаклашты.