ОРВИ: иң мөһиме – профилактика

Үзәк больница мәгълүматлары буенча, узган атнада 368 кеше, шул исәптә 14 яшькә кадәрге - 228, бер яшькә кадәрге 32 бала ОРВИ белән авырды. Нигездә балалар авырый. 3 нче мәктәптә 18-24 февраль көннәрендә бер сыйныф карантинда булды.

- Теләсә нинди очракта барлык профилактик чараларны күрергә кирәк, югыйсә авыру көтмәгәндә килеп чыгарга һәм төрле дәрәҗәдәге катлауланулар тудырырга мөмкин, - дип кисәтә район эпидемиологы Дамира Кашапова.

Без педиатр Наталья Панфёровадан мәктәпләрдә хәл торышы белән кызыксындык.

- Үзәк больница ОРВИны профилактикалау буенча шәфкать туташлары өчен укулар оештыра. Алар һәр көнне сыйныфларда йөреп чыгалар. Әгәр авырулар булса, аларны укудан азат итәләр. Без шәфкать туташларын сыйныфларда профилактик чаралар үткәрергә, педиатр белешмәсе белән балаларны кабул итәргә өйрәтәбез. Бүгенге көндә уку процессы штатлы режимда алып барыла. Димәк, мәктәпләрдә эш дөрес куелган. Температурасы күтәрелгән балаларга ашыгыч ярдәм өйләренә килә. Больницага вакытында мөрәҗәгать итәргә, авыру кешеләр белән элемтәне чикләргә тырышыгыз.

- Октябрь аенда әти-әниләре ризалыгы белән мәктәп укучыларын вакцинацияләү, грипп һәм кискен респираторлы авыруларны профилактикалау буенча лекцияләр үткәрелде. Авыру балаларны ачыклыйбыз һәм изоляциялибез, андыйлар мәктәпкә йөрергә тиеш түгел. Сыйныф бүлмәләрен җилләтү оештырыла, су белән җыештыру, кулларны даими сабынлап юуны тәкъдим итәбез, микробларны булдырмас өчен шул да җитә, язгы-көзге чорда - рационда яшелчә һәм җиләк-җимешләр кимегәндә, өстәмә витаминнар комплексы кабул итү мөһим. Даими физик күнегүләр ясау, бигрәк тә саф һавада, кызу адымнар белән җәяү йөрү шулай ук файдага булачак, - дип киңәш бирә 1 нче мәктәпнең шәфкать туташы Татьяна Малышкина.

Бу очракта педиатрия службасы үзенчәлекле роль уйный.

- Ирина Геннадьевна Пупышева һәрвакыт ярдәмгә килә, һәр сорауга төпле киңәш бирә. Ул иң яхшы балалар табибы, - ди ике бала анасы Юлия Шакирова.

- Авыруны алдан кисәтергә мөмкин, гриппка каршы прививканы мин октябрь аенда ясаттым. Өлкәннәрнең сәламәтлеге турында кайгыртулары өчен рәхмәт. Хәзер күбрәк җиләк-җимеш, лимон ашарга тырышам, - ди пенсионер Раиса Костылева.