Ә сез грипптан прививка ясаттыгызмы?

Салкыннар көтмәгәндә килде һәм, һәрвакыттагыча, без аларга әзерләнмәдек. Медиклар билгеләгәнчә, суыкта озак булу, балансланмаган туклану, көчсез иммунитет, стресслар кискен респиратор авырулар очраклары артуга китерә.
Профилактик чаралар грипп һәм ОРВИны кисәтүгә юнәлдерелә. Болар - салкыннарга кадәр иммунны ныгытучы препаратлар куллану, чыныгу, сәламәт яшәү рәвеше, шулай ук симптомнары барлыкка килгәннән соң беренче 48 сәгать эчендә яки янәшәдә авыручылар булганда вируска каршы препаратлар кабул итү. Безнең илдә авыруны кузгатучыны бетерүгә юнәлдерелгән үзенчәлекле профилактика РФ Сәламәтлек саклау министрлыгы приказы белән расланган Профилактик прививкаларның милли календаре нигезендә башкарыла. Алты айга кадәрле яшьтәге балалар, 1-11 нче сыйныфлар укучылары, студентлар, медицина, коммуналь, транспорт оешмалары хезмәткәрләре, йөкле хатыннар, 60тан узганнар, армиягә чакырылучылар, хроник авырулары булганнар вакцинацияләнергә тиеш. Калган категорияләр вакцинаны үз хисапларына алалар. Йөкле хатыннарга прививка икенче һәм өченче триместрда ясала.
Тавык аксымына аллергиядән интегүчеләргә, авыруның кискен чорында, алты айга кадәрге балаларга, элек прививкадан соң тән температурасы 390тан күтәрелгән кешеләргә, энә керткән урында диаметры сигез сантиметрдан арткан гиперемия булганнарга вакцинация тыела.
Вакцина кертүгә җавап итеп, иммун системасы хроник авырулар һәм иммунитеты көчсезләнгән кешеләр өчен мөһим булган саклаучы антитәнчекләр эшләп чыгара. Саклау эффекты 8-12 көннән барлыкка килә һәм 8-12 айга кадәр саклана.
Вакцинациядән соң ике тәүлек хәл булмаска, 370ка кадәр тән температурасы күтәрелергә, борын тыгылырга мөмкин, болар парацетамол кабул иткәннән соң бетә. Абсолют сәламәт кеше, кагыйдә буларак, вакцина кертүгә чыдам.
Ни өчен дәүләт гриппны иммунопрофилактикалауга средстволар тота? Грипп вирусы даими үзгәрә. Һава-тамчы ысулы белән таралу сәбәпле, ул кыска вакыт эчендә бик күп кешеләрне зарарлый.
Клиник картина авыру кискен башлану, бизгәк тоту, организм агулану белән характерлана. Авырганнарның 10 проценты пневмония кебек катлаулану ала, ул еш кына үпкә кабару белән тәмамлана. Гайморит, отит, мастоидит, бронхиолит, миокардит кебек катлауланулар да булырга мөмкин. Алар озак һәм кыйммәтле дарулар белән дәвалана.
Авырудан соң тернәкләнү бер айдан артык дәвам итә. Бу вакытта кеше тиз арый, игътибарсыз була, хезмәт җитештерүчәнлеге кими.
Вакцинацияне көз көне үткәрү актуаль. Уңай һәм тискәре якларны яхшылап үлчәп, дөрес карар кабул итегез. Сезнең һәм якыннарыгызның иминлеге шуңа бәйле булачак. Менделеевлылар вакцинация буенча үзәк больницага 315 нче кабинетка мөрәҗәгать итә алалар.