Чәчү эшләре тәмам, Сабантуйлар гөрләп узды

Район авылларында һәм шәһәр мәйданында Сабантуй бәйрәме узды.
Традиция буенча аны район авыл хуҗалыгы предприятиеләре парады ачты.
Беренче булып мәйданга хезмәт ярышында беренче урын яулаган "Кама" колхозы" ҖЧҖ делегациясе аяк басты.
Район башлыгы Игорь Привалов авыл хезмәтчәннәренә ихлас күңелдән котлау сүзләре юллады. Россия Җәза үтәү буенча Федераль службасы ТР буенча идарәсе начальнигы Дәүфит Хәмәдишин менделеевлыларны республика Президенты исеменнән котлады.
Язгы кыр эшләре йомгаклары буенча призлы урыннарны яулаган авыл хуҗалыгы хезмәткәрләре район башлыгының Мактау грамоталары һәм премия белән бүләкләнделәр. "Кама" колхозы" механизаторы Айрат Җиһаншин чәчүнең абсолют батыры дип танылды. Ул чәчү вакытында "МТЗ-1221" тракторында 791 эталон гектар җирдә эшләрне югары сыйфатлы итеп башкарды. "Алтын башак" һәм "Победа" хуҗалыклары уңганнары хезмәт ярышында икенче һәм өченче урыннарны яуладылар.
Хореографик композиция әзерләгән иҗат коллективлары, авылларның кунакчыл ишегаллары Сабантуйга күңеллелек һәм милли төсмер өстәде.
Авыл хуҗалыгы җитештерүе ветераннары мәйдандагы чараларны күзәтә, алар арасында Монаштан Виталий Никандров та бар.
- 14 яшемнән колхозда эшли башладым, - дип сөйли Виталий Семёнович. - Берничә мәртәбә чәчү батыры булдым. Пенсиягә чыккач та 18 ел эшләдем. Сабантуй - иң яраткан бәйрәмнәремнең берсе.
Никандровларның хезмәт династиясен уллары Александр һәм Михаил дәвам итә.
Тантана геройлары барысы да диярлек - нәселле авыл хуҗалыгы хезмәткәрләре. Бу көнне югары бүләк - ТР Дәүләт Советы Рәисенең Рәхмәт хатына лаек булган Нина Мальгинаның да әти-әнисе гомерләрен терлекчелеккә багышлаган кешеләр.
- Хуҗалыкта 22 ел эшлим, - ди "Алтын башак" ҖЧҖ машина белән саву операторы Нина Михайловна. - Минем карамакта 60 сыер. Хезмәтем җиңел түгел, ләкин үземне башка өлкәдә күз алдына китерә алмыйм.
Берничә мәйданда милли һәм спорт уеннары җәелдерелде, аларда менделеевлылар гына түгел, Кытайдан кунаклар да көч сынадылар, мәйдандагы тамашаны видеога төшерделәр. Киенренке бил алышулардан соң Чаллы егете Ренат Әхмәтшин көрәш буенча Сабантуйның абсолют батыры булды. Азат Гыйбаев, Илдар Әһлиев үз авырлык категориясендә җиңү яуладылар. Волейбол турнирында Бәзәкәдән ирләр командасы алдынгы булды. Хатын-кызлар арасында "Химик" ССК, шәхси беренчелектә Рәис Муллануров (перекладинада тартылу), Михаил Иванов (армрестлинг), Андрей Липин (гер күтәрү) җиңделәр. Баганага менгән Алексей Белов призга бәрән алды.
Балалар төрле аттракционнарда күңел ачтылар, сәүдә киштәләре тәмле ризыклардан сыгылып торды.
- Мин озак еллар Алабугада яшим, - ди Нина Сабирова, - әмма һәр елны гаиләм белән Менделеевск Сабан туена киләм, якташларым белән бәйрәм шатлыгын уртаклашам.

Ольга Смолькова

Рәис Сәхапов фотолары