Айсылу – Нәүрүз гүзәле

"Юность" район мәдәният йортында (директоры Рәйхана Фәрхетдинова) "Нәүрүз гүзәле" бәйгесе узды.
Нәүрүз элек-электән чәчү алдыннан үткәрелгән һәм Сабан туе кебек үк халык аны көтеп алган.
Бәйрәмне каршы алу көннәрендә һәркем начар эшләрдән ерак торып, миһербанлылык кылырга, мохтаҗларга ярдәм күрсәтергә, ата-баба каберләрен барларга тырышкан. Яшьләр йорттан-йортка йөреп Нәүрүз шигырьләре әйткәннәр, матур теләкләр җиткергәннәр, күңелле ял иткәннәр. Безнең якларда бераз онытылган бәйрәм соңгы вакытта киң колач белән билгеләп үтелә. Узган атнада шул уңайдан Нәүрүз гүзәлен билгеләү чарасында биш уңган, сөйкемле, сылу татар кызы катнашты.
Алып баручы Рәкига Хәмәтгалимова конкурсантлар белән таныштырып, аларны төрле сынауларда үзләрен күрсәтергә чакырды.
Кызлар шигырь һәм җыр телендә беренче "Визит карточкасы" этабында үзләре турында сөйләделәр. Сәхнә осталыгы, зәвыклы бизәлгән милли ризыклар, Яз - матурны чагылдырган "Нәүрүз киеме" биремнәрендә осталыкларын ачтылар. Һәркайсы Гүзәл титулына ия булырлык әзерләнгән туташларны жюри әгъзалары төрле номинацияләрдә билгеләделәр. Районның өлкән сыйныф укучылары үзләрен белемле, иҗади, җитез һәм тыйнак та итеп таныттылар. Нәтиҗәдә, Камайдан Әгълиева Азалия "Иң максатчан", Алёна Данилова - "Иң музыкаль" (Татар Тәкәше), Абалач кызы Алинә Миңнеголова - "Иң сөйкемле", шәһәрнең 1 нче мәктәбендә укучы Фәридә Хәмәтдинова "Тамашачы күңелен яулаучы" дип билгеләнделәр.
"Нәүрүз гүзәле" - Турай мәктәбенең 10 нчы сыйныф укучысы Айсылу Кәлимуллина чыннан да бу исемгә лаек икәнен исбатлады. Татарча камил белүче иҗади кыз шигырьне да оста язуын, моңлы тавышы белән һәркемне әсир дә итүен күрсәтте. Әнисе белән бергә әзерләгән чәк-чәк "букет"ына тиңнәр булмады. Аны конкурска әзерләүдә булышучы мәдәният йорты директоры Фәния Мөхәмәтхатыйпова белдерүенчә, гел "5" билгесенә генә укучы Айсылу мәгариф учреждениесендә узган бар чарада катнаша, шулай ук кул эшләре остасы да. Айсылудан азга гына калышкан Алинә белән дә аралаштык. Ул вокал белән шөгыльләнә. Конкурсларда катнаша, ә моңга мәхәббәте Гөлсинә әбисеннән күчкән. Бәйгедә үзен уңышлы күрсәтә алган кыз мәдәният йорты директоры Гөлфия Шәйхетдиновага рәхмәтле. Конкурс тәмам. Катнашучы кызлар истәлекле бүләкләр, котлаулар кабул иттеләр. Чараны музыкаль яктан Данияр Кәбиров бизәде.
Фәймә Вахриева