Сәхнәдә – педагоглар

"Дуслыгыбыз мәдәниятнең күптөрлелеге белән ныклы" халык иҗаты фестивале эстафетасын мәгариф идарәсе хезмәткәрләре кабул итте.
"Юность" РМЙ фойесында район педагогларының кул эшләре күргәзмәсе җәелдерелде. Монда чигелгән картиналар, агачтан эшләнгән әйберләр, курчак-чәйнек, олимпия символикасы белән мендәрләр һ.б.лар белән сокланырга булды.
- Халык иҗаты - ул берничә буын бөртекләп җыйган байлык. Безнең мәдәниятебез шуларга нигезләнгән, - дигән сүзләр белән алып баручылар Лениза Исмәгыйлова һәм Илбар Таһиров чараны ачтылар.
Кузнецовлар квартеты (1 нче мәктәп), "Очарование" үрнәк бию коллективы, (БИҮ), Зиннәтуллиннар ансамбле тамашачыны әсир итте. Крюковларның гаилә дуэты (Тихоново мәктәбе) башкарган балачак турында җыр күңелләрне тибрәтте. 3 нче мәктәп укытучысы Анна Орлова "Нәфис сүз" номинациясендә чыгыш ясады.
Бу көнне менделеевлыларга рус, татар, удмурт, мари, әрмән һәм башка халыклар мәдәнияте белән танышу мөмкинлеге бирелде. Ольга Камашева (Иске Гришкин мәктәбе), Нәсимә Гыйльфанова (2 нче балалар бакчасы), Айгөл Иванова (Монаш мәктәбе), Ольга Ишаева (13 нче балалар бакчасы), Ульяна Харитонова (Бәзәкә мәктәбе), Гөлнур Төхвәтова (7 нче балалар бакчасы), Ринат Шакиров (8 нче балалар бакчасы) ялгыз җыр башкардылар.
Песәй һәм Татар Чаллысы мәктәбе укытучыларының сәхнәләштерелгән тамашасы, "Соловушка" биюе (3 нче мәктәп), Денис Ожиганов башкарган ария ("Форпост" үзәге), коррекция мәктәбе һәм 10нчы балалар бакчасы хезмәткәрләре яңгыраткан дуэтлар концерт бизәге булды. Залдан "Афәрин!", "Булдырасыз!" дигән сүзләр даими яңгырап торды.
13 нче балалар бакчасы триосы, 1 нче һәм 4 нче мәктәпләр, 1 нче һәм 6 нчы балалар бакчасы, Тихоново, Турай, Яңабирде мәктәпләре вокал ансамбльләре чыгышын тамашачы яратып кабул итте. 2 нче, 7 нче, Ижёвка, Илнәт мәктәпләре, 7 нче, 12 нче, Монаш балалар бакчалары коллективлары менделеевлыларга хорегорафик композиция бүләк иттеләр.
Мәгариф идарәсе начальнигы Сергей Данилов фестивальдә катнашучыларга Рәхмәт хатлары тапшырды.
- Бай эчтәлекле концерт өчен рәхмәт, бүген барыгыз да шундый югарылыкта булдыгыз! - диде Сергей Артелинович.
- Концерт бер мизгел кебек узды. Елдан-ел номерлар яхшыра бара, - ди педагог Ирина Вольнова.
- Концертларны калдырмый йөрергә тырышам, бүген чыгыш ясаучыларның барысы да булдырды, - дип фикере белән бүлешә ветеран Фәния Мөбарәкшина.

Вәсилә Мортазина

Рәис Сәхапов фотолары