Алтын пар бию өермәсендә

Ярты гасыр буена тормыш авырлыкларын җиңеп, бергә яшәү, балалар үстерү һәм аннан артка борылып карап, бәхетле булуыңны аңлау турында күпләр хыялланадыр. Дистә еллар буена бер-береңә хөрмәт һәм мәхәббәт хисләрен саклап калу һәркемгә дә бирелми. 26 октябрьдә алтын туйларын билгеләп үткән Валентина Ивановна һәм Владимир Иванович Трапезниковлар гаиләсе бәхетле гаилә турында хыялны чынбарлыкка әйләндерде.
Юбилярлар белән тантана шатлыгын коллегалары, туганнары, дуслары уртаклашты. Район башлыгы урынбасары Рөстәм Хәбибуллин котлау миссиясе белән килде. Ул район башлыгы Игорь Привалов исеменнән аларга истәлекле бүләк тапшырды.
ТР Эчке эшләр министрлыгының Менделеевск районы бүлеге начальнигы полиция полковнигы Геннадий Сушков, аның урынбасары Рәшид Мадъяров, ЮХИДИ бүлеге начальнигы Тәлгат Фазлыев хокук саклау органнарына 30 елдан артык гомерен багышлаган ветеранга һәм аның хатынына изге теләкләр җиткерделәр.
Сугыш һәм хезмәт ветераннары рәисе Любовь Сорокина, "Бердәм Россия" партиясенең җирле бүлекчәсе башкарма комитеты җитәкчесе Клавдия Смирнова, "Менделеевские новости" газетасының баш мөхәррире Лариса Кривилёва Трапезниковлар гаиләсен ихлас күңелдән котлап, гаилә башлыгына актив тормыш позициясе хас булуын билгеләп үттеләр.
Владимир Иванович - ЭЭБ ветераннар советы рәисе, район ветераннар советы әгъзасы, район газетасының штаттан тыш хәбәрчесе, "Бердәм Россия" партиясен хуплаучы, - дип ассызыклады җитәкчеләр.
Уллары Сергей яраткан әти-әнисенә озак елларга сәламәтлек теләде. Котлаулар тәмамланганнан соң Михаил Харитонов һәм Павел Дудаков башкаруында үтемле җырлар яңгырады.
ЗАГС бүлеге мөдире Гөлнара Гудовская Боз сараеның тантаналар залында алтын юбилярларның никахын яңарту йоласын романтик рухта башкарды. Мендельсон маршы яңгыравы, вальс әйләнү ир белән хатынга яңа өйләнешкән пар итеп хис итү, дулкынлану һәм шатлык тою мөмкинлеге бирде.
Ныклы һәм бәхетле гаиләнең сере нәрсәдә дигән сорауга, Владимир Трапезников:
- Чын гаилә - ул мәхәббәт һәм хөрмәт кенә түгел, зур тырышлык, түземлек тә таләп итә. Никахны озак еллар саклап калу гаилә өчен җаваплылык тою, бер-береңне аңлау һәм ярдәм итү, якын кешеңне кимсетмәү, үз ялгышыңны танып, юл куя белү, шул вакытта бергә булуның бәхет икәнлеген аңлыйсың.
Мәхәббәт һәм тугрылык өчен хатынына роза чәчәкләре бүләк итте ул. "Ачы!" дип кычкыру астында 50 ел бергә гомер иткән пар никахларын кабат назлы үбешү белән беркеттеләр.
Лариса Миңнегалиева
Рәис Сәхапов фотосы