Азат Тимергалиев Иҗтимагый палатада Менделеевск шәһәрен тәкъдим итә

Районда Дәүләт Советы депутаты Ринат Ханбиков катнашында "Бердәм Россия" һәм "ПолитЗавод-2014" иҗтимагый-сәяси проектларын гамәлгә ашыру буенча яшьләр форумы узды.
Район башлыгы Игорь Привалов Менделеевск территориясендә Россия һәм региональ проектларны гамәлгә ашыру турында сөйләде.
- Район яшьләре - ул көчле инновацион потенциал, безнең киләчәгебез аларга бәйле, - дип ассызыклады Игорь Привалов.
- "ПолитЗавод-2014" проекты кысаларында бүген Иҗтимагый палатага яшьләрне сайлау уздырыла. Район яшьләрен тәкъдим итә торган лаеклы кандидат сайларсыз дип уйлыйм, - диелә "Сатори" клубы директоры, республиканың яшьләр Иҗтимагый палатасы әгъзасы Лилия Богатова чыгышында, ул яшьләр сәясәтенең төп юнәлешләрен яктыртты.
Кандидатларның һәркайсы үз эшчәнлеге һәм программасының төп аспектлары турында сөйләде.
- Кадрлар сәясәте мәсьәләләре буенча "түгәрәк өстәл" утырышлары уздыру, яшьләрнең һөнәри үсешен тәэмин итү, яшь гаиләләргә ярдәм чаралары оештыруны "Бердәм Россия" партиясенең "Яшь гвардиясе" штабы эшчәнлегенең мөһим юнәлешләре дип саныйм. Яшьләр көне кысаларында кварталга бер мәртәбә химиклар, педагоглар, төзүчеләр һ.б. белгечләр белән тематик кичә-очрашулар үткәрергә тәкъдим итәм, - диде Пенсия фонды юрисконсульты Марина Комарова.
Яшьләр бүлеге начальнигы урынбасары Олег Якимов хәрби-патриотик клублар белән үзара хезмәттәшлек, предприятиеләргә экскурсияләр оештыру, потенциаль эш бирүчеләр белән очрашу, яшьләрнең социаль-көнкүреш проблемаларын барлау һәм аларны хәл итү юлларын эзләүне өстенлекле бурычлар дип атады.
"ТИСБИ" идарә университеты студенты, иҗади яшьләр академиясенең техник администраторы Азат Тимергалиев район яшьләренең иҗтимагый оешмасын булдыру, "Ел лидеры" конкурсының район этабын үткәрү нияте булуын әйтте, "Кадрлар резервы" проекты тренерларын чакырып, актив яшьләр өчен "Юниор" лагеры базасында җәйге смена оештыру, предприятиеләрнең профсоюз оешмалары һ.б.лар белән элемтәне көйләү турында тәкъдим белән чыкты.
Дәүләт Советы депутаты Ринат Ханбиков яшьләргә мөрәҗәгатендә болай дип ассызыклады:
- Тормышта үз юлыңны табу гына аз, рухи-әхлакый сыйфатларны - ихласлык, кайгыртучанлык, изгелек, ышанучанлык, дуслыкны югалтмау да әһәмияткә ия.
Яшерен тавыш бирүдән соң исәпләү комиссиясе рәисе Оксана Габделбариева нәтиҗәләрне игълан итте. Күпчелек тавыш белән ТР Дәүләт Советы каршындагы Яшьләр иҗтимагый палатасы вәкиле итеп Азат Тимергалиев сайланды.
- Хуплавыгыз өчен рәхмәт, ышанычыгызны акларга тырышырмын, - диде ул җавап сүзендә.
Форум партия билетлары тапшыру һәм резолюция кабул итү белән тәмамланды.

Вәсилә Мортазина

Рәис Сәхапов фотолары