Балага ничә яшьтән кәрәзле телефон алырга кирәк?

Mendeleevskyi.ru сайты аша онлайн-сораштыру үткәреп, корреспондентларыбыз узган атнада шушы сорауга җавап эзләде, анда 40 кеше катнашты.
Тавыш бирү нәтиҗәләре шундый: 27 кеше (67,5%) бала мәктәпкә бара башлагач кына телефон кирәк дип саный. 9 респондент (22,5%) фикеренчә, бала өлкән сыйныфларда укыганда кәрәзле телефонның булуы мөһим. Ике менделеевлы (5%) телефон бала бакчага йөри башлагач та кирәк дип раслый. Берәр респондент (2,5%) "бөтенләй кирәкми" һәм "төгәл әйтергә кыенсынам" дигән җавапны сайладылар.
Без бу турыда педагоглар, медицина хезмәткәрләре, ата-аналар фикерен белештек.
Галина Бузаджи, башлангыч сыйныф укытучысы:
- Мәктәп яшендә телефон кирәк дип уйлыйм. Мисал өчен, минем 4"а" сыйныфында 24 укучы, шуларның кайберләре посёлокта яши. Икенче сыйныфка күчеп, икенче сменада укый башлагач күпләренең телефоннары барлыкка килде. Хәзер барысының да кәрәзле телефоны бар. Баласының кайда булуын белергә теләмәгән ата-ана юктыр. Баланың мобиль телефоны булу әти-әниләрне артык борчудан арындыра, дип уйлыйм.
Геннадий Герасимович, поликлиника мөдире:
- Куркынычсызлык һәм әти-әнисе белән даими элемтәдә булу мөмкинлеген исәпләгәндә, дөрес, кәрәзле телефон кирәк. Әгәр гадәттән тыш хәлләрдә кирәкле номерларга басарга өйрәтсәң, бала өчен куркыныч кимүне тәэмин итәргә була. Әмма сәламәтлегенә куркыныч янамасын өчен, бик кечкенә яшьтә сатып алырга киңәш итмим. Шуның өстенә телефон баланың адаптация һәм аралашу сәләтен чикләргә мөмкин, аңа бәйлелек тууы бар. Балалар дөньясы хәзер еш кына компьютер, Интернет, кәрәзле телефон тирәсендә әйләнә, урамга чыгу ихтыяҗы кими. Кайбер балалар үзләренең виртуаль дөньясында үсә башлый. Үсмер төркемдә телефон - социаль статусның үзенчәлекле күрсәткече, кайвакыт балалар арасында "кемнең телефоны затлырак" дигән нигездә сәламәт булмаган ярыш башлана.
Наталья Архипова, VIII төр коррекция мәктәбе директоры урынбасары:
- Мин педагог һәм ана буларак фикеремне белдерәм: мобиль телефон бала өчен түгел, улын яки кызын контрольдә тоту мөмкинлеге булсын өчен әти-әниләргә кирәк. Кәрәзле телефон күптән инде аралашуның мөһим һәм уңайлы чарасына әйләнде. Баласы белән шалтыратышып, сөйләшкән ата-ана үзен күпкә тынычрак тоя. Ә иң мөһиме ул сезгә шалтыратып, теләгән соравын бирә, киңәш сорый, ә кайвакыт якынының тавышын ишетә ала. Чөнки алдынгы фикерле замана балалары да әти-әниләрен сагына.