Дмитрий Менделеевның 180 еллыгына

8 февральдә Дмитрий Иванович Менделеевның тууына 180 ел булды. Бу истәлекле дата уңаеннан укучыларга бөек галимнең биографиясеннән аерым фактлар тәкъдим итәбез.
Унҗиденче бала
Дмитрий Менделеев 1834 елның 8 февралендә туа. Ул гаиләдә соңгы - унҗиденче бала була. 13 яшендә - әтисез, ә студент елларында әнисез кала.
Укытучы
Дмитрий Менделеев Санкт-Петербургның Баш педагогия институтын тәмамлаган. Педагогик карьерасының башлангычында математика, физика, табигать фәннәрен укыта.
Булмаган төш турында
Имеш, бер көнне Менделеев төшендә химик элементларның периодик таблицасын күргән, аннан соң аны уйлап чыгарган дигән фикер йөри. Әмма галим бу легенданы кире кага һәм болай ди: "Мин аның өстендә, бәлки, егерме ел утырганмындыр, ә сез кинәт кенә... һәм барысы да әзер, дип уйлыйсыз".
Менделеев Бондюгта
Бөек рус химигы берникадәр вакыт Ушковларның химия заводында булган, 1893 елда төтенсез күкерт җитештерү технологиясе өстендә эшләгән.
Аэростатта очулар
Дмитрий Менделеев шулай ук очу аппаратлары конструкциясе өстендә дә эшләгән, аэростат һәм һава шарында очкан. Корабль төзелешенә һәм Арктик диңгездә йөзүне үзләштерүгә игътибар биргән.
Чемодан ясау остасы
Бөек галим фәнни эш белән генә шөгыльләнмәгән. Буш вакытларында ул бик теләп чемоданнар ясаган. 1895 елда күзе сукырайганнан соң да, капшанып чемоданнар ябыштыруын дәвам иткән.
Фән белән генә түгел
Менделеев ике мәртәбә өйләнгән. Беренче хатынын үзеннән күпкә яшь кыз өчен ташлаган, бу гамәл җәмгыятьтә ризасызлык тудырган. Дмитрий Иванович алты бала атасы: икесе Феозва Лещева белән беренче никахтан туа, дүртесе - Анна Попова белән икенче никахтан.
Өлкән улы Владимир диңгез офицеры була. Өлкән кызы Ольганың токымлы этләр үрчетүе турында билгеле. Кызы Любовь Мейерхольд төркемендә артист була һәм Александр Блокка кияүгә чыга. Иван, әтисе юлыннан китеп, метрология институтында эшли. Мария әтисенең Ленинград университеты каршындагы музей-архивын җитәкли. Василий су асты көймәләре, миналарга киртә ясау конструкторы була. Россиядә беренче бронировкаланган чылбырлы трактор проектын эшли.