Фатирдан нәрсә ясадылар, хәтта гафу үтенмәделәр
Редакциягә мөрәҗәгать белән апалы-сеңелле Ирина Самашкина һәм Татьяна Мещихина килделәр. Татьяна Сергеевна сөйләвенчә, капиталь ремонт вакытында эшчеләр аның фатирында склад ясыйлар. Эш коралларын һәм киемнәрен шунда урнаштыралар, идәнне ачалар. Безнең иҗат төркеме әлеге фатирга юнәлде. - Бу шәхси милеккә үтеп керү, - дип юлда барганда ризасызлыгын белдерде хуҗабикә. - Без...
Редакциягә мөрәҗәгать белән апалы-сеңелле Ирина Самашкина һәм Татьяна Мещихина килделәр. Татьяна Сергеевна сөйләвенчә, капиталь ремонт вакытында эшчеләр аның фатирында склад ясыйлар. Эш коралларын һәм киемнәрен шунда урнаштыралар, идәнне ачалар. Безнең иҗат төркеме әлеге фатирга юнәлде.
- Бу шәхси милеккә үтеп керү, - дип юлда барганда ризасызлыгын белдерде хуҗабикә. - Без хокук саклау органнарына мөрәҗәгать иттек, карарыбыз ныклы: гаеплеләр җавап тотарга тиеш.
Фатир Бурмистров урамындагы 2 нче йортта беренче катта урнашкан. Күргәннәр газета һәм телевидение корреспондентларын гаҗәпләндерде. Һәр бүлмәдә һәм кухняда идәннәр ачылган, линолеумнан вак кисәкләр генә калган. Стена белән түшәм арасында ярык, һәр җирдә пычрак, тәмәке төпчекләре, кемдер онытып калдырган эш киемнәре... Видеога төшергән оператор идән астына егылып төшкәндә калды. Сәламәтлеген куркыныч астына куеп, ул видеосюжет өчен кирәкле кадрларны ясады. Бу вакытта хуҗабикә "экскурсияне" дәвам итте.
- Җиде ел Костромада яшим, әнием Менделеевскида тора. Елга бер мәртәбә кайтам. Узган ел кайта алмадым. Фатир ачкычы туганымда - нинди хәл булмас. Бердәм исәп-хисап үзәгендә фатирда беркем дә яшәмәгәнен беләләр, тиешле документлар тапшырылган, газ, электр энергиясе һәм суга каплавыч куелган. Һәр айны туганнарга акча җибәрдек, алар тиешле сумманы түләп барды, шуңа да карамастан, бердәм исәп-хисап үзәгендә безнең фатирга 83 мең сум бурыч булуы турында әйттеләр. Кайдан килгән ул?
Татьяна Мещихина полиция хезмәткәрләрен чакырта, алар беркетмә төзи. "Нептун" идарәче компаниясе директоры Сергей Тихонов, шәһәр архитекторы Равил Хәбиров, ремонт-төзелеш цехы начальнигы Ринат Габдуллин составында комиссия җыела.
Шунысы ачыклана, Бурмистров урамындагы 2 нче йортта узган ел Карпов исемендәге химия заводының подряд оешмасы капиталь ремонт үткәргән. Бинаның подвалы юк, шунлыктан, торбаларга керүне тәэмин итү өчен, эшчеләр идәнне ачарга мәҗбүр булган. Чөнки бу фатирда берничә мәртәбә торба тишелә. Шунысы гаҗәп, киенү-чишенү урыны ясаган бүлмәне ни өчен элеккеге хәленә кайтармаганнар һәм хуҗаларын табарга омтылыш ясамаганнар. Күрше йортта яшәүче Владимир Землянов билгеләп үткәнчә, ул эшчеләрнең кухня тәрәзәсе аша торба һәм башка төзелеш материаллары ташыганын күргән. Бүгенге көндә материал полиция карамагында тикшерүдә.
Шуны билгеләп үтәргә кирәк, бу йорт авария хәлендә дип табылды. Күптән түгел бер фатирда стена ауган. Могҗиза белән генә бу вакытта бүлмәдә беркем дә булмаган.
Ринат Габдуллиннан хәлне аңлатуын сорадык, нәкъ менә ул капиталь ремонт үткәргән подряд оешмасының җитәкчесе. Эшнең нидә икәнен белгәч, ул иртәгә шалтыратуыбызны сорады. Аннан соңгы көннәрдә аның телефоны я дәшмәде, я сүндерелгән иде.
Вәсилә Мортазина, Гөлүзә Гыйләҗетдинова,
Гөлшат Гыйләҗева фотолары
.jpg)
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
