Химия йөрәк кушуы буенча

"Л.Карпов исемендәге химия заводы" ААҖ генераль директоры, район советы депутаты Дамир Шәмсин күптән түгел истәлекле юбилеен билгеләп үтте.
Казан химия-технология институты чыгарылышының хезмәт биографиясе 1988 елда Алексин химкомбинатында башлана. Ул 1991 елның февралендә Менделеевскига күчеп килә һәм "Л.Я.Карпов исемендәге химзавод" җитештерү берләшмәсенә ремонт-механика цехы начальнигы урынбасары булып билгеләнә.
Бер елдан яшь, перспективалы, читтән торып икътисадчыга укучы белгечне предприятиенең икътисад бүлегенә начальник урынбасары итеп күчерәләр. Профсоюз комитеты рәисе, "Кама-Сакс" ҖЧҖ җитәкчесе итеп сайлануы һөнәри үсеш мөмкинлеге бирә.
2003 елның гыйнварында Д.Шәмсин химия сәнәгатенең борынгы предприятиесенә генераль директор итеп билгеләнә. Тормыш юлының барлык этапларында югары оештыру сәләте, җитештерү белән бәйле бурычларны хәл итүгә җаваплы якын килүе белән аерыла. Аның җитәкчелегендә предприятиенең үсеш стратегиясе формалаша, продукция ассортименты сизелерлек киңәя, перспективалы инвестиция проектлары уңышлы гамәлгә ашырыла.
Дамир Рәфисович - җитәкчеләрнең яңа буын вәкиле - менә дигән белемле, энергияле, прогрессив уйлаучы. Аның хезмәте күпсанлы дәүләт бүләкләре, "Почётлы химик", "ТРның атказанган химигы" мактаулы исемнәре белән бәяләнә. Актив тормыш позициясе, күпьеллык депутатлык эшчәнлеге, район һәм шәһәр үсешенә керткән өлеше аеруча хөрмәткә лаек.