Итек һәм изге сүз җылыта

Климат үзгәрү турында ни генә әйтмәсеннәр, Крещение суыклары расписание буенча килә. "Сез салкыннарда ничек җылынасыз?" Безнең корреспондентлар Роза Шәрәфиева һәм Вәсилә Мортазина менделеевлыларга шул сорауны бирделәр.
Рамил Рәхмәтуллин, машина йөртүче:
- Интернеттан һава торышын ачыклыйм, тиешенчә киенергә тырышам. Салкыннар көчле икән, күпкатлы кием ярдәм итә, ләкин ул хәрәкәтне чикләмәскә итеш. 30 ел инде юлга термос алу гадәтен үзгәртмим. Итекне хөрмәт итәм, ләкин бердәнбер кимчелеге - руль артында уңайсыз. Нинди аяк киемендә булуыгызга карамастан, аның кысмавы мөһим, аяк һәм ботинка арасында җылылык саклаучы һава катламы йөрергә тиеш.
Галина Митрофанова, "Комфорт Успех+" ҖЧҖ эшче-яшелләндерүчесе:
- Теләсә нинди һава торышында - кармы, салкынмы, эшкә чыгабыз. Бүген без Эльвира Пантелеева һәм Айрат Вәлиев белән тротуар чистартабыз. 25 градус салкын булуга да карамастан, кәеф күтәренке. Эштә итек, куртка, бияләй бирәләр. Мондый һава торышының сере - җылы киенеп күбрәк хәрәкәтләнүдә. Изге сүз дә җылыта. Кайбер менделеевлылар эшебез өчен рәхмәт әйтә, җанга җылы булып китә.
Анатолий Иванов, итек сатучы:
- Итекләр, элеккеге кебек үк, ихтыяҗ казана, аеруча балаларныкы. Аны әбиләр яраткан оныкларына ала. Ассортимент киң, фабрикада җитештерелгәннәре дә бар, ләкин кулдан басканнарын күбрәк алалар. Мин Кукмарадан. Итекләр турында барысын да беләм.
Илсөяр Артамонова, ашыгыч медицина ярдәме фельдшеры:
- Декабрьдән башлап безгә өч артык туңган һәм ике өшегән пациент китерелде. Шушы көннәрдә генә Революция Тавыннан аерым яшәү урыны булмаган ир-атны больницага салдык. Диагнозы - алкоголь куллану, ике үкчәсенең дә өшүе. Соңгы елларның статистикасыннан күренгәнчә, менделеевлылар азрак туңа.
Николай Токарев, ТР буенча "Россельхозцентр" ФДБУ филиалының Менделеевск бүлеге баш агрономы:
- Соңгы үлчәү нәтиҗәләре буенча басуларда кар катламы 25-30 см тәшкил итә, димәк, уҗым культуралары өчен борчылыр урын юк. Алар ак юрган астында булганда, салкыннар куркыныч тудырмый.
Илнар Аббазов, "Лигры" хоккей командасы тренеры:
- Салкыннарда төп проблема - машинаны кабызу. Кыш көне капюшонлы киемгә өстенлек бирәм, шапка белән перчатканы да онытмыйм. Бозга чыкканда да киенергә иренмим. Боз сараенда буфет эшләгәнгә сөенәм, һәрвакыт кайнар чәй эчәргә була.
Гөлнара Павлова, мәгариф идарәсе начальнигы урынбасары:
- Без көн саен укучыларның мәктәпкә йөрүенә мониторинг үткәрәбез. Исегезгә төшерәм, башлангыч сыйныфларда (1-4 нче) авыл мәктәпләрендә укулар температура 23 градустан түбән булганда туктатыла, шәһәр мәктәпләрендә - 25 градуста. Авыл мәктәпләрендә 5-9 нчы сыйныфларга температура 25 градустан түбән булганда укырга бармаска ярый, шәһәрдә - 27 градуста. Өлкән сыйныфларга килгәндә, температура чикләре - 30 һәм 32 градус.